Osyǵan deiin ákim qyzmetin atqaryp kelgen Balǵabai Ybyraev qala basshysy qyzmetinen óz erkimen ketti. Oblys ákimi Ábilqaiyr Sqaqov Aqsý ákimi qyzmetinde eki jyldan astam ýaqyt boiy atqarǵan jumysy úshin Balǵabai Ybyraevqa alǵysyn bildirdi, dep habarlaidy "Ult aqparat".
- Turǵyn úi qurylysy belsendi júrgizildi, kóptegen iri áleýmettik jobalar iske asyryldy, Sizdiń tájiribeńiz ben bilimińiz bizdiń óńir turǵyndary úshin paidaly bolady dep senemin. Sizge aldaǵy jumystaryńyzǵa tabys, otbasyńyzǵa amandyq jáne zor densaýlyq tileimin, - dedi óńir basshysy Balǵabai Ybyraevqa.
Aqsý qalasynyń ákimi laýazymyna usynylǵan Nurjan Áshimbetovtiń kandidatýrasyn qalalyq máslihat depýtattary biraýyzdan qoldady.
Jańa qala basshysyn tanystyra otyryp, oblys ákimi Nurjan Áshimbetovtiń biliktiń atqarýshy jáne ókiletti organdarynda mol tájiribesi bar ekenin atap ótip, onyń aldyna birinshi kezektegi mindetter qoidy.
- Ónerkásip óndirisiniń, elektr energiiasynyń ósýin, óńdeý ónerkásibin damytýdy qamtamasyz etý qajet. Sondai-aq ekonomikany ártaraptandyrý, shaǵyn jáne orta biznesti, shaǵyn indýstriialyq aimaqtardy damytý jáne jeke investitsiialardy tartý boiynsha belsendi jumys júrgizý qajet. Aqsý aýyldyq aimaǵynyń áleýeti zor – buǵan nazar aýdarý kerek,- dedi óńir basshysy.
Budan basqa, Aqsý qalasynda memlekettik baǵdarlamalardy iske asyrý jáne turǵyn úi qurylysyn aiaqtaý oblys basshylyǵynyń erekshe baqylaýynda bolady.
Nurjan Áshimbetov 1969 jyly Pavlodar oblysy Lebiaji aýdany Chernoe aýylynda dúniege kelgen.
1993 jyly Almaty zooveterinarlyq institýtyn «Zooinjener» mamandyǵy boiynsha, 2002 jyly Almaty Ekonomika jáne statistika institýtyn «býhgalter-ekonomist» mamandyǵy boiynsha, al 2014 jyly Resei halyq sharýashylyǵy jáne memlekettik qyzmet akademiiasyn «memlekettik jáne mýnitsipaldyq basqarý» mamandyǵy boiynsha támamdaǵan.
Eńbek jolyn 1993 jyly Pavlodarda «Sáýle» kontserniniń qyzmetkeri bolyp bastaǵan. Sol jyly Pavlodar memlekettik múlik jónindegi aýmaqtyq komitetinde istedi.
1994-1995 jyldary – «Maqsat» jastar turǵyn úi kooperativiniń mamany. 1995 jyldan Pavlodar aýmaqtyq memlekettik múlik komitetiniń mamany, bas mamany.
1996 jyly USAID jobasynyń Pavlodar oblysyndaǵy «Karana» korporatsiiasynyń keńesshisi boldy.
1996 jylǵy jeltoqsannan 1997 jylǵa deiin «Remek» konsaltingtik firmasynyń direktory, 1997-1998 jyldary Lebiaji aýdanyndaǵy óndiristik kooperativtiń tóraǵasy, 1998-1999 jyldary sol aýdandaǵy agrofirmanyń direktory.
1999 jyly Aqtoǵai aýdany ákiminiń orynbasary bolyp taǵaiyndaldy. 2001 jyldan 2006 jylǵa deiin Lebiaji aýdanynyń ákimi qyzmetin atqardy.
2006-2008 jyldary Pavlodar oblysy aýyl sharýashylyǵy basqarmasynyń basshysy.
2008-2009 jyldary Qazaqstan Respýblikasy Prezidenti Ákimshiliginiń memlekettik inspektory.
2009 jyly Petropavl qalasynyń ákimi bolyp taǵaiyndaldy. 2012-2016 jyldary - Pavlodar oblysy ákiminiń orynbasary.
2016 jyly Pavlodar qalasynyń ákimi laýazymyna taǵaiyndaldy, al 2018 jyldan 2019 jylǵa deiin Ekibastuz qalasynyń ákimi boldy.
2019 jylǵy qyrkúiekte Qazaqstan Respýblikasy Parlamenti Májilisi VI shaqyrylymyndaǵy depýtaty boldy.
