Almatylyq Iýliia Sheglova áleýmettik jeli arqyly habarlama taratyp, balasyn 20 myń AQSh dollaryna satpaq bolady. 5 sáýirde Máskeýge kelip, kelisim boiynsha balany ózgeniń qolyna berýge bel bailapty. Al Iýliianyń anasy barlyq jaǵdaidy bolar is bolǵannan soń estigenin aitady, dep habarlaidy KTK.
"Ekinshi sáýirde úide bolǵan. Biraq, úige kelsek áldenege asyqqany baiqalady. Teledidar qosýly qalǵan. Tamaǵy ishilmegen. Onyń qashan Reseige ketkenin, ne úshin mundai qadamǵa barǵanyn bilmeimin. O jaqtan habar jetkende, talyp qala jazdadym", — deidi Iýliia Sheglovanyń anasy Liýbov Zaitseva.
Iýliia Sheglova júktiliktiń 3 ailyq kezeńinde kúieýimen ajyrasqan eken. Oǵan qoldaý bildirip, járdemdesken jandar Iýliia bosanǵan soń qatty kúizeliske ushyraǵanyn aitady.
"Estigende eseńgirep, túnimen uiyqtamai shyqtym. Bárimiz bir-birimizge habarlasyp, bolǵan jaittyń aqiqattyǵyna kóz jetkizdik. Biz oǵan senip, úmit artqan edik. Ulyna qajetti dári-dármek, kiim-keshek bolsyn, barlyǵyn oǵan tapsyrǵanbyz. Shyndyǵynda eshteńege muqtaj emes bolatyn", — deidi Almaty qalasynyń turǵyny Anita Gýrman.
Al, balasyn saýdalaǵan bezbúirek kelinshektiń burynǵy kúieýi qazir Máskeýge attanypty. Odan jaýap alynyp, jábirlenýshi retinde tanylǵan. Al tergeý ókilderi barlyq qujattarmen tanysqan soń, balany ákesiniń qolyna bergen.
33 jastaǵy Iýliia Sheglovanyń áreketin qarjylyq qiynshylyqtan dep boljaǵandar da bar. Biraq Almatyda turatyn anasy "bizge basyndaǵy ahýaldy aitqanda qyzymyzdy kez kelgen qiyndyqtan qutqaratyn edik" deidi. Qazir qazaqstandyq azamatshaǵa adam saýdalaý baby boiynsha qylmystyq is qozǵalyp, qolyna kisen salynǵan.
