Elimizdiń fristail-mogýldan ulttyq quramasynyń bas jattyqtyrýshysy Elena Krýglyhinaǵa qatysty qyzmettik tekseris júrip jatyr. Bul týraly QR Mádeniet jáne sport ministri Dáýren Abaev málim etti, dep habarlaidy QazAqparat.
«Qazir fristail-mogýldan ulttyq quramanyń bas jattyqtyrýshysy Elena Krýglyhinaǵa qatysty qyzmettik tekseris júrip jatyr. Sonyń qorytyndysyna qarai sheshim qabyldanady. Qosymsha habarlaimyz», - dep qysqa qaiyrdy Dáýren Abaev Shýchinskide ótken XXIV qysqy olimpiada oiyndarynyń qorytyndysyna arnalǵan keńeitilgen otyrysta.
Sondai-aq, ol ministrliktiń kásibi sportshylarǵa qatysty ustanymyn aitty.
«Sportshyny salaǵa qaityp alyp kelý máselesimen ministrlik ainalyspaýy tiis. Sheshimdi sportshynyń ózi nemese jattyqtyrýshysy qabyldaidy. Bul jerde ministrdiń sheshimi emes, sportshynyń nátijesi men kórsetkishi mańyzdy», - deidi ol.
Eske sala ketsek, ótken jyly fristail-mogýldan ulttyq quramanyń bas jattyqtyrýshysy Elena Krýglyhina men sportshy Aleksandr Geberttiń arasynda daý týyndady.
Aitýynsha, bas jattyqtyrýshy sportshyǵa til tigizip jáne zańsyz aqsha jinaǵan.
Elena Krýglyhina óz kezeginde aiypty joqqa shyǵardy.
