Aq úidiń baspasóz hatshysy Djen Psaki
Kommertsiialyq jolaýshy ushaǵyn Minskige buryp, onda bolǵan jýrnalisti tutqyndaǵany úshin AQSh Belarýske taǵy qosymsha sanktsiia saldy.
3 maýsymnan bastap AQSh Belarýstiń toǵyz memlekettik mekemesine tolyq sanktsiia engizedi. Bul jónindegi 28 mamyrda Aq úidiń baspasóz hatshysy Djen Psaki málimdedi, dep jazady Azattyq.
«Rejimdi óz áreketi úshin jaýap berýge kóndirý jáne Belarýs halqynyń umtylysyna qoldaý bildirý maqsatynda seriktesterimiz ben odaqtastarymyzben birge osy sharalardy qolǵa aldyq» dedi Psaki.
Amerika Qurama Shtattary Belarýs úkimetindegi «adam quqyqtaryn buzýǵa, jemqorlyqqa, 2020 jylǵy sailaý nátijesin burmalaýǵa jáne 23 mamyrdaǵy oqiǵalarǵa qatysy bar» adamdarǵa jekelep sanktsiia salý úshin Eýropa odaǵyndaǵy seriktesterimen birlesip jumys istep jatyr dedi Psaki.
Belarýs 23 mamyrda Ryanair reisin "ótirik syltaýmen" májbúrlep burdy degen ol Eýropa odaǵynyń eki múshesi arasyndaǵy reisti Minskige kúshtep qondyrý jáne onyń bortynda bolǵan Belarýs jýrnalisi Roman Protasevichti tutqyndaý - «halyqaralyq normalardy óreskel buzý» dep atady.
Belarýstiń toǵyz memlekettik mekemesi budan buryn da sanktsiiaǵa ilinip, keiinnen AQSh-tyń qarjy ministrligi bul shekteýlerdi biraz báseńdetken.
Jańa ereje boiynsha, AQSh azamattarynyń bul mekemelermen qarym-qatynasqa túsýine shek qoiylady.
Buǵan qosa, AQSh memlekettik departamenti óz azamattaryna Belarýske barmaý jóninde keńes berdi ári federaldyq aviatsiia basqarmasy (FAA) Belarýstiń áýe keńistigimen ushatyn ushaqtarǵa asa saq bolýdy eskertti.
23 mamyrda Afinydan Vilniýske ushyp bara jatqan Ryanair áýe kompaniiasynyń ushaǵynda bomba bar degen aqparat alǵanyn aitqan Belarýs basshylyǵy áýege MiG-29 joiǵysh ushaǵyn kóterip, reisti Minsk halyqaralyq áýejaiyna qondyrǵan. Ushaq bortynan eshqandai bomba tabylmaǵan.
Psakidiń aitýynsha, «Belarýs halqy demokratiia men adam quqyqtaryn qorǵaýǵa umtylyp jatqanda» Lýkashenko rejimi osyndai áreketke bardy.
Ol ushaqtyń burylý sebebin zertteý úshin «senimdi halyqaralyq tergeý» júrgizýge, saiasi tutqyndardyń bárin bosatýǵa, «EQYU sheńberinde jáne osy uiymnyń baqylaýymen ádil de ashyq prezident sailaýyn ótkizý úshin demokratiialyq oppozitsiianyń jáne azamattyq qoǵamnyń liderlerimen shynaiy saiasi dialog ornatýǵa» shaqyrdy.
AQSh EQYU-ny «halyqaralyq normalarǵa qaishy kelip, demokratiia men adam quqyqtaryn buzyp otyrǵan» Lýkashenko rejimine qarsy shara qoldanýǵa shaqyra beredi dedi Aq úidiń baspasóz hatshysy.
28 mamyrda Sochide Resei prezidenti Vladimir Pýtinmen kezdesken Aleksandr Lýkashenko ushaqty burý oqiǵasyna Batystyń reaktsiiasyn «emotsiianyń kórinisi» dep atady.
Oqiǵadan soń álemniń kóp eliniń ushaqtary Belarýs áýe keńistigin ainalyp óte bastady, keibiri tipti bul elge qatynaityn reisterin toqtatty.
Roman Protasevich – Belarýste byltyr tamyzdan beri tolastamaǵan oppozitsiia sherýlerinen habar taratqan NEXTA telegram-arnasynyń negizin qalaýshylardyń biri. Qazir ol qamaýda otyr.
