Álemniń jetpiske jýyq tiline aýdarylǵan, balalarǵa arnalǵan eń ataqty komiks-romandardyń biri «Tentek balaqaidyń kúndeligi» («Wimpy Kid») qazaq tilinde jaryq kórdi, dep habarlaidy "Ult aqparat".
AQSh jazýshysy, sýretshi Jeff Kinni jazǵan bul kitapty qazaqstandyq «Steppe & WORLD Publishing» baspasy shyǵardy.
Baspa ókilderiniń aitýynsha, kitapty qazaq jáne aǵylshyn tilderinde oqýǵa bolady, iaǵni bir basylymda eki tildegi nusqa qatar berilip otyr.
«Balalar planshet pen telefonnan airylmaidy, kitaptan qashady. Sonyń kesirinen boiynda psihologiialyq teris ózgerister bolyp jatady. Muny qumarlyqqa teńer edim. Kóp ata-ana balalaryna kitap oqýdyń paidasyn túsindire almai qinalady. «Tentek balaqaidyń kúndeligi» komiks-romany osyndaida jaqsy kómekshi bolmaq. Bul eńbekti balalar súisinip oqidy jáne basqa kitapty oqýǵa degen qulshynys paida bolady. Al túpnusqa mátinniń qatar berilýi aǵylshyn tilin jaqsartady», - deidi baspa basshysy Raisa Qadir.
Sonymen qatar, ol kitap avtory Jeff Kinni Qazaqstanǵa kelýge nietti ekenin aitty.
«Aldaǵy ýaqytta avtordy arnaiy shaqyryp, oqyrmandarǵa erekshe kesh syilaimyz dep úmittenemin», - deidi baspa basshysy.
«Tentek balaqaidyń kúndeligin» qazaq tiline aýdarǵan – Nárkez Berikqazy. Redaktory – Nazgúl Qojabek.
Kitaptyń bas keiipkeri – qarapaiym oqýshy Greg Heffli. Ol basynan ótken alýan túrli qyzyq oqiǵany kúndelik retinde jazyp júredi. Gregtiń sýrettegenin oqyǵan ár bala ózin tanidy, sabaq alady.
«Mátini jeńil, sýretteri tartymdy, keiipkerlerinen balalyq ańǵaldyq pen tazalyq lebi esip turǵan kitapta ár oqýshynyń basynan ótetin, ata-anamen, muǵalimdermen, synyptastarmen aradaǵy qatynas, jaqsy men jamannyń baiybyna barý, bardy bar, joqty joq dep túsiný evoliýtsiiasy sipattalǵan», - deidi Raisa Qadir.
