Foto: Gazeta.Rý
AQSh-tyń Ýkraina jáne Resei jónindegi arnaiy ókili Kit Kellogg áskeri kómekti qaita jandandyrýdyń sharttaryn atady, dep jazady inbusiness.kz ÝNIAN agenttigine silteme jasap.
Onyń muny Vashingtondaǵy Halyqaralyq qatynastar jónindegi keńestiń pikirtalasyndaǵy baiandamasynda aitqan.
– Ýkrainadaǵy soǵys jalǵasyp jatqan jaǵdaida Reseidiń oqshaýlanýyn jalǵastyrý jáne onymen eshqandai ózara árekettestik júrgizbeý endi ómirsheń nemese turaqty strategiia bolyp sanalmaidy jáne jaýapty diplomatiialyq qadam emes, – dedi ol.
Ol Tramptyń kózqarasy "AQSh-tyń Reseimen qarym-qatynasty qaita jandandyrýy qajet" degen túsinikke negizdelgenin atap ótti.
Kellogg Aq úide Ýkraina prezidenti Vladimir Zelenskii men AQSh prezidenti Donald Tramp arasynda bolǵan kelispeýshilikke qatysty pikir bildirdi.
Onyń oiynsha, bul jaǵdai eki kóshbasshynyń maqsatynyń ártúrli bolýyna bailanysty órbigen.
– Zelenskii ózin Tramptyń Reseige qarsy ashyq túrde qoldaǵanyn qalady. Biraq Tramp bul kezdesýdi bir taraptyń ekinshisine ústemdik etý múmkindigi retinde qarastyrǵan joq, – dep túsindirdi AQSh prezidentiniń arnaiy ókili.
4 naýryzda Tramp Ýkrainaǵa barlyq áskeri kómekti toqtatýǵa buiryq bergen edi.
Bul sheshim Aq úidegi ashyq qaqtyǵystan keiin Zelenskiige qysymdy kúsheitý maqsatynda qabyldanǵan.
Sonymen qatar, AQSh Ýkrainamen barlaý derekterimen almasýdy tolyqtai doǵardy. Buǵan áskeri nysandarǵa qatysty málimetter, Reseidiń zymyrandary men drondarynyń ushyrylymdary týraly aldyn ala eskertýler kiredi.
