AQSh-tyń Reseige sanktsiialary áserinen elimizde jańa kólikter quny qymbattaýy múmkin. Bul týraly ortalyq kommýnikatsiialar qyzmetinde avtomobil salasyndaǵy kásiporyndar odaǵynyń basshysy Oleg Alferov aitty, dep habarlady astanatv.kz.
Onyń sózinshe, sanktsiia saldarynyń kólik naryǵyna áseri sala mamandaryn tolǵandyryp otyr. Teńge men rýbldiń dollarǵa shaqqandaǵy baǵamy quldyrai tússe, importtalatyn kólikterdiń qymbattaýyna ákeledi. Al, memlekettik qyzmetkerler shet eldik qymbat kólikterdi satyp alýdy jalǵastyryp otyr.
"Memlekettik qyzmetkerlerdiń qyzyǵýshylyǵyn týdyratyn Toyota Camry jáne Hilux kólikteri. Baǵasy 10-13 million teńge aralyǵynda. Qostanai oblystyq IID 13,9 million teńgege, Shymkenttegi máslihat apparaty 12,9 million teńgege sheteldik kólik alǵan. Jalpy, byltyr memlekettik qyzmetkerler 4,7 milliard teńgege 461 dana qymbat kólik satyp alǵan", — deidi "Qazavtoóndiris" Qazaqstan avtomobil salasy kásiporyndary odaǵynyń" basqarma tóraǵasy Oleg Alferov.
Dese de salada jaqsy dinamika baiqalady. Osy jyldyń alǵashqy toqsanynda otandyq kólik óndirisi eki esege artqan. Qańtar-naýryz ailarynda kólik óndirýshiler quny 40 milliard teńge turatyn 7 myń kólik shyǵarǵan. Onyń ishinde arnaiy tehnika, avtobýstar, júk kólikteri men kólik tirkemeleri bar. Temir tulparlardy satý da qarqyn alyp, eki esege artqan. Jeńil kólik alýshylar jańa kólikke 26 milliard teńgedei qarajat jumsapty. Bul byltyrǵymen salystyrǵanda eki jarym esege kóp. Qazir otandyq kólik óndirisi importtalatyn kólikpen boi túzep, 50 de 50 qalpyna jetti, — dedi Alferov.
Onyń pikirinshe, mundai nátijege jańa modeldermen, jeńildetilgen nesieler arqasynda qol jetip otyr.
