AQSh-tyń Máskeýdegi elshiligi 12 mamyrdan bastap konsýldyq qyzmetterdi barynsha qysqartady. Tek erekshe jaǵdailarda viza máselesin qarastyrady. Bul týraly elshiliktiń taratqan habaramasynda jazylǵan.
Elshiliktiń habarlaýynsha, buǵan Máskeýdiń talaby boiynsha konsýldyq shtatyndaǵy qyzmetkerlerdiń 75 paiyzǵa qysqarýy sebep bolǵan. 23 sáýirde Resei biligi AQSh diplomatiialyq missiiasyna shetel azamattaryn jumysqa alýǵa tyiym salynǵanyn habarlaǵan.
"Resei úkimetiniń áreketi bizdi konsýldyq qyzmetkerlerin qysqartýǵa májbúrlep otyr, bul ókinishti" delingen elshilik habarlamasynda.
Buǵan deiin Resei prezidenti Vladimir Pýtin "dostyq nieti joq elderdiń" diplomatiialyq ókildikterine sheteldikterdi jumysqa alýǵa shekteý qoiatyn jarlyqqa qol qoiǵan.
"Dostyq nieti joq" elderdiń tizimin úkimet anyqtaidy. Buǵan deiin zańnamada mundai termin bolmaǵan. Qujatta AQSh pen ózge elderdiń dostyq dep ataýǵa kelmeitin áreketterine "jaýap" retinde osyndai shara qoldanylatyny kórsetilgen. Akkreditatsiialanǵan diplomattarǵa jarlyqtyń qatysy joq.
2016 jyldyń sońynan beri Resei men AQSh diplomatiialyq ókildiktegi qyzmetkerler sanyn qysqartý jóninde bir-birine alma kezek talap qoiyp keledi. 2017 jyldan bastap reseilikterge viza berý protsesi edeýir shektelgen.
