QR Memlekettik xatshysy Gúlshara Ábdiqalyqova Irannyń Qazaqstandaǵy Tótenshe jáne Ókiletti elshisi Modjtaba Damirchilýmen kezdesti. Búgin elshiniń diplomatiialyq missiiasy aiaqtalyp otyr, dep xabarlaidy QazAqparat tilshisi.
Óz sózinde G.Ábdiqalyqova elshiniń qyzmeti úshin alǵys bildirip, osy ýaqyttyń ishinde biraz sharalardyń atqarylǵanyn jetkizdi. "Irannyń prezidenti birneshe ret kelip ketti. Bizdiń Elbasymyz da saparmen bardy. Sol kezde indýstiialdyq-innovatsiialyq jáne saýda-ekonomikalyq kelisimderge qol qoiyldy. Jobalardyń jalpy quny - 1,3 mlrd teńge. Qazirgi kezde osy saladaǵy jumys atqarylyp jatyr. Al Qazaqstan men Irannyń arasyndaǵy saýda-sattyq bir jylda 550 mln dollarǵa jetti. Degenmen, on jyl buryn atalǵan kórsetkish 2 mlrd dollar bolǵan. Sondyqtan áli de biraz jumys jasaý qajet. Iran men Eýraziialyq ekonomikalyq odaq arasynda ýaqytsha saýda aimaǵyn qurý týraly kelisim rásimdelgen bolatyn. Sonyń aiasynda ekijaqty saýda ainalymy artady degen úmit bar", - dedi G.Ábdiqalyqova.
Budan bólek, Memlekettik xatshy Irannyń iadrolyq baǵdarlamasyna da toqtaldy. "Ókinishke qarai, AQSh Irannyń iadrolyq baǵdarlamasynan shyǵyp ketti. Bizdińshe, atalǵan máseleler diplomatiialyq jolmen sheshilýi kerek. Árine, basqa memleketterdiń ol kelisimdi qoldap otyrǵany bizdi qýantady. Qazaqstan osy qujatty ázirleý sharalaryna belsene atsalysty. Sondyqtan biz kelisimniń ary qarai iske asýyna múddelimiz", - dep atap kórsetti G.Ábdiqalyqova.
Elshi Modjtaba Damirchilý qazaq xalqynyń qonaqjailylyǵy úshin alǵys bildirip, Qazaqstandy qimai qoshtasyp jatqanyn jetkizdi. "Osy ýaqyttyń ishinde Qazaqstan meniń ekinshi úiim bolyp ketti. Degenmen, diplomatiialyq missiiamnyń aiaqtalýyna bailanysty óz elime qaitýym qajet", - dedi M.Damirchilý. Onyń aitýynsha, tórt jyldyń ishinde Qazaqstan men Iran arasyndaǵy saýda-ekonomikalyq bailanystar jandana tústi. Oǵan eki el basshylarynyń ózara saparlary úlken serpin berdi. "Ásirese, kólik salasyn erekshe atap ótken jón. Bizde temirjol bolsyn, avtomobil joldary bolsyn, júk tasymaly boiynsha biraz sharalar atqaryldy. Sosyn eki eldiń saýda palatasyn qurdyq. Sóz joq, ol da óz úlesin qosyp keledi", - dep atap kórsetti M.Damirichilý.
