Biylǵy 20 mamyrda Niý-Iorktyń ońtústik okrýgi boiynsha AQSh okrýgtik soty Ilias pen Viktor Hrapýnovtarǵa qarsy sheshim shyǵardy. Bul týraly "Ult aqparat" QR Ádilet ministrliginiń resmi saityna silteme jasap habarlaidy.
«Múddesine Ádilet ministrligi ókildik etetin – Almaty qalasynyń ákimdigi jáne BTA Bank talapkerlerdiń talap-aryzdaryn rastaityn aqparatty ashyp aitýyn talap etti. Sot taraptardyń pozitsiiasyn zerdelegennen keiin, Ilias pen Viktor Hrapýnovtar sotpen «mysyq-tyshqan» oiynyn ádeii uiymdastyrdy jáne olardyń bul áreketi jazalanýǵa tiis degen sheshimge keldi. Sot Iliastyń joǵalǵan elektrondyq hattar týraly syltaýlaryn aqylǵa qonbaidy dep tanydy.
Buǵan deiin, sot Muhtar Ábilázovtiń de osyǵan uqsas is-áreketin jazalaǵan edi. Ol kezde Ábiliazov dáleldemelerdi áshkereleý protsedýrasy barysynda qujattardy usyna almaǵan bolatyn.
Sot Almaty qalasynyń ákimdigi men BTA Banktiń talap-aryzdaryna tikelei qatysy bar aqparattardy umytyp qalǵany týraly Hrapýnovtardyń ýájdemesin jalǵan dep tanydy. Sot paiymynsha, Ilias tiisti aiǵaqtardy qasaqana joiyp jibergen», - delingen aqparatta.
Málim etilgendei, sýdia Ilias pen Viktor Hrapýnovtarǵa Almaty qalasy ákimdigi men BTA Bank zańgerlerine ketken shyǵyndy óteýdi mindettedi.
Sonymen qatar, sot Hrapýnovtar budan bylai belgili bir dáleldemelerdi usyný quqyǵynan aiyrylatynyn jáne alqa bilerge Ilias dáleldemelerdi qasaqana joiǵany týraly nusqaý beriletinin úkim etti.
«Buǵan deiin, sot Muhtar Ábiliazovqa qatysty da alqa bilerge dál osyndai nusqaý beriletindigi týraly qaýly etken edi», - delingen málimette.
«Budan bólek, Almaty qalasy ákimdigi men BTA Bankiniń Feliks Saterge qarsy qatar júrip jatqan sot protsesinde de sot talapkerlerdiń paidasyna sheshim qabyldady. Jaýap alý barysynda Sater Hrapýnovtar men Ábiliazovtiń Almaty qalasynda tyńshylary bar ekendigi jáne onyń qaýipsizdigine qaýip-qater tónýi múmkindigi týraly málimdedi. Sot óz sheshiminde Ábiliazovtiń 2018 jyly Qazaqstanda BTA Banktiń buryńǵy basshysyn óltirgeni jáne kóptegen basqa da qylmystar úshin sottalǵanyn eskere otyryp, Saterdiń úreii senýge turarlyq ekendigin atap ótti», - dedi Ádilet ministrliginen.
Eske sala keteiik, erli-zaiypty Hrapýnovtar memlekettik múlikti urlaý, alaiaqtyq jasaý, laýazymdyq ókilettikti asyra paidalaný, para alý jáne urlaǵan múlikti zańdastyrý boiynsha aiyptaldy. Memleketke keltirilgen shyǵyn 250 million dollardan astamdy quraidy.
2018 jyldyń qazanynda Almaty qalasynyń burynǵy ákimi Viktor Hrapýnov jasaǵan qylmystary úshin kináli dep tanylyp, oǵan múlkin tárkileýmen birge, qaýipsizdigi barynsha joǵary koloniiada 17 jyl bas bostandyǵynan aiyrý jazasy belgilendi. Sondai-aq, ol Ulttyq bank, qarjy mekemeleri, memlekettik uiymdar men basqa da mekemelerde qyzmet atqarý quqyǵynan aiyryldy. Sondai-aq ol barlyq marapattary men ordenderinen aiyryldy.
Al V.Hrapýnovtyń zaiyby Leila Hrapýnova 14 jylǵa bas bostandyǵynan aiyryldy. Kúieý balasy Aiiar Iliiasov 5 jylǵa sottaldy.
Qazaqstan aýmaǵynan 2017 jyly shyǵyp ketken aiyptalýshylarǵa qatysty sot protsesi syrttai ótti.
