AQSh-ta tirkelgen barlyq áýe kompaniialaryna Iran, Irak jáne Oman shyǵanaǵynyń áýe keńistiginen ushýǵa tyiym salyndy. AQSh-tyń federaldyq aviatsiia ákimshiligi taratqan málimdemede tyiymnyń "Taiaý Shyǵystaǵy saiasi jaǵdaidyń ýshyǵýymen bailanysty" ekeni aitylǵan.
"AQSh federaldyq aviatsiia ákimshiligi Taiaý Shyǵystaǵy jaǵdaidy ári qarai da muqiiat baqylai beredi" delingen málimdemede.
8 qańtarda Iran AQSh-tyń Iraktaǵy keminde eki áskeri bazasyn ondaǵan zymyranmen atqylady. AQSh-tyń federaldyq aviatsiia ákimshiligi shabýyl týraly aqparat shyqqan soń birneshe saǵattan keiin osyndai málimdemeni taratty.
AQSh prezidenti Donald Tramp shabýyldan keiin zardap kólemi anyqtalyp jatyr, ázirge "bári jaqsy" dep jazdy.
"Bári jaqsy! Irannan Iraktaǵy eki áskeri bazaǵa qarai zymyrandar jiberildi. Qazir qurbandar sany men shyǵyn kólemi anyqtalyp jatyr. Erteń tańerteń málimdeme taratamyn" dep jazdy.
Islam revoliýtsiiasy korpýsynyń "Quds kúshteri" arnaiy jasaǵynyń qolbasshysy Súleimani 3 qańtarda Baǵdattaǵy AQSh-tyń áýe shabýyly kezinde mert bolǵan. Ony óltirýge AQSh prezidenti Donald Tramp tikelei buiryq bergen. "Quds kúshteri" Irannyń syrttaǵy áskeri operatsiialaryna qatysqan.
Tegeran "Súleimanidi óltirgen AQSh-tan kek alatynyn" málimdegen. AQSh prezidenti Donald Tramp ta "Tegeran shabýyl jasasa, Irannyń 52 ornyn bombalaitynyn" aitqan.
