Vashington taiaý eki jyldyń ishinde Tájikstannyń qaýipsizdik salasyna 60 million dollardan astam qarajat bóledi. Bul týraly AQSh-tyń Tájikstandaǵy elshisi Djon Mark Pommershaim málimdedi, dep habarlaidy Azattyq radiosy.
Onyń sózinshe, atalǵan kómek aiasynda AQSh Tájikstanǵa shekaradaǵy baqylaýdy kúsheitý úshin "Puma" dronyn beredi. Osy boiynsha taraptar 20 million dollarlyq kelisimge kelgen.
Pommershaim Tájikstan úshin Aýǵanstannyń soltústik bóliginde ornalasqan terrorlyq toptardan qaýip bar ekenin jetkizdi. Ol ázirge AQSh-tyń Tájikstan aýmaǵynda áskeri baza ashýǵa nieti joq ekenin aitty.
"Tájik-aýǵan shekarasyna beketter, sonymen birge 900 shekarashyǵa jáne olardyń otbasy múshelerine shekara otriadyn quryp berý josparda bar", - dedi Pommershaim.
Resmi málimetke sáikes, AQSh úkimeti 1992 jyldan beri Tájikstannyń qorǵanys salasyna kómek retinde 330 million dollardan astam qarjy bólgen.
AQSh elshiligi málimdemesinde Vashington sońǵy 30 jyldyń ishinde qaýipsizdik, ekonomikalyq damý, densaýlyq saqtaý, azamattyq qorǵanys jáne bilim berý baǵdarlamalary aiasynda Tájikstanǵa kómek retinde jalpy 1,8 mlrd dollar qarjy bólingeni aitylǵan.
