AQSh-ta prezident sailaýynan keiin daýys sanyn esepteý jalǵasyp jatyr.
Prezidenttikten respýblikashyl Donald Tramp pen burynǵy vitse-prezident, demokrat Djo Baiden úmitti.
Sailaýshylardyń basym bóligi iaǵni, 100 mln sailaýshy merziminen buryn daýys bergen.
AQSh-ta Nur-Sultan ýaqyty boiynsha, kúndizgi saǵat 12.00-de barlyq sailaý ýchaskeleri jabylǵan. Eń sońǵy bolyp Aliaska shtaty daýys bergen.
Associated Press agenttiginiń boljamynsha, (Nur-Sultan ýaqyty boiynsha kúndizgi saǵat 11:30-daǵy aqparat) Baiden - 18 shtatta (arasynda Kaliforniia, Niý-Iork, Kolýmbiia okrýgy bar - 223 elektor daýys bergen), Tramp - 22 shtatta (Aiova, Ogaio, Florida t.b - 210 elektor daýys bergen) jeńiske jetken.
"Sailaý tartysty ótip jatqan" shtattarda jeńimpaz ázirge anyqtalmaǵan. Tramp Djordjiia, Michigan, Kaliforniiada alda keledi, Baiden Arizona, Meinde ozǵan. Daýys sany áli eseptelip jatyr. Jaǵdai ózgerýi múmkin.
4 qarashaǵa qaraǵan túni jaqtastary aldynda sóilegen Djo Baiden jeńiske jetetinine senim bildirip, ózin qoldaǵan azamattardy sál sabyr saqtaýǵa shaqyrǵan. Prezident Donald Tramp Twitter-de sailaýda alda kele jatqanyn aityp, biraq óziniń "jeńisin" urlaýǵa tyrysyp jatyr dep shaǵymdanǵan. Ol jaqyn arada málimdeme jasaýǵa ýáde berdi.
Alaida Twitter Tramptyń habarlamasyna "daýly kontent" belgisin qoiyp, oqyrmandarǵa eskertý jariialady. "Bul twit-habarlamada sailaý nemese ózge azamattyq sharaǵa qatysý máselesi boiynsha oqyrmandardy jańyldyrýy múmkin daýly kontent bar" dep jazylǵan eskertýde.
Sailaýda jeńiske jetý úshin kandidatqa elektorlar alqasynyń 270 daýysy kerek.
Kóptegen biýlleten poshta arqyly jóneltilgendikten keibir shtattarda daýys sanaý birneshe kúnge sozylýy múmkin.
Bul jolǵy sailaýda sailaýshylar belsendiligi sońǵy 100 jyl ishinde bolmaǵan deńgeige jeteiin dep tur.
Amerika sailaýshylary osy sailaý aiasynda ókilder palatasyndaǵy 435 oryn men senattaǵy 100 orynnyń 35-in kim ielenetinin de anyqtaidy, 11 gýbernator men jergilikti bilik tarmaqtaryndaǵy túrli qyzmet ielerinen úmitti kandidattarǵa daýys beredi.
