QR Syrtqy ister ministrligi AQSh-taǵy iri alaiaqtyq áreketterge úsh Qazaqstan azamatynyń qatysqanyn rastady, dep xabarlaidy "Ult aqparat".
"Bizdiń Niý-Iork qalasyndaǵy bas konsýldyǵymyz Amerika tarapymen tyǵyz qarym-qatynasta, qajetti konsýldyq jáne quqyqtyq qorǵaýǵa qatysty kómek kórsetilip jatyr. Niý-Iork shtatynyń ońtústik okrýgynan kelip túsken málimetke sáikes, qamaýǵa alynǵan azamattardyń arasynda bizdiń úsh azamatymyz bar. Olar - Aziza Djavadazade nemese Djalolova, 1994 jyly týǵan, Diora Áshirova, 1991 jyly týǵan, jáne Elena Qudaibergenova, 1970 jyly týǵan. Biz olardyń Qazaqstan azamattary ekenin rastaimyz. Olardy qamaýǵa aldy. Biz óz tarapymyzdan tiisti kómek berip jatyrmyz", - dedi Q.Ábdiraxmanov jýrnalisterge bergen suxbatynda.
Aita keteiik, buǵan deiin sheteldik buqaralyq aqparat quraldarynda Niý-Iork qalasynda qylmystyq toptyń ustalǵany jaiynda jazyldy. 25 adam iri alaiaqtyqpen ainalysty. Olar ǵalamtorda jalǵan xabarlandyrýlardy ornalastyryp, kólikterdi satqan. Alaida ýaqytsha firmalar arqyly aldyn ala tólem alǵannan keiin izderin jasyryp otyrǵan. Osylaisha, alaiaqtar 4,5 mln dollardy qoldy qylǵan. Niý-Iork shtatynyń zańnamasy boiynsha qylmyskerler 20-30 jylǵa deiin bas bostandyǵynan aiyrylýy múmkin.
