Foto: Saparbek Naǵashybek Facebook-paraqshasynan
AQSh-ta Muhtar Maǵaýinniń beiitine qulpytas qoidy. Bul týraly Facebook-paraqshasynda Saparbek Naǵashybek jazdy, dep habarlaidy Ult.kz.
"Búgin Vashingtonda qazaqtyń uly jazýshysy, zertteýshisi ári tarihshysy Muhtar Maǵaýinniń beiitiniń basyna qulpytas ornatylyp, Amerikadaǵy “Muhtar Maǵaýin atyndaǵy Qazaq ulttyq mádeni-aǵartý ortalyǵynyń” resmi tanystyrylymy ótti", - dep jazdy ol.
Jazýshynyń uly Edige Maǵaýin ákesiniń basyna qoiylǵan qulpytastyń maǵynasy týraly túsindirip ótti. Ol ákesiniń qazaq ádebieti men ǵylymyna qosqan mol murasyn qulpytasta ashyp kórsetýge tyrysqandaryn aitty.
"Bul jerge (beiit basyna, red.) bir jyldyń ishinde qansha qazaq kelip ketti. Bári de bul jerdi qazaqtyń kieli jeri retinde qabyldaityndaryn aitty. Sondyqtan biz ákemizdiń basyna tas qoiǵan kezde kelgen adamdarǵa áser beretindei bolsyn, ákemizben syrlasqandai bolsyn degen oimen osyndai etip jasap shyǵardyq.
Nege qulpytasqa taýdy jasadyq deitin bolsaq, bul bizdiń ata-babalarymyzdyń júrip ótken joly, tarihy.
Al kóne túrki jazýy - bizdiń kóne túrki tarihymyz.
Ákem ádebietke jolyn jańadan bastaǵan kezde, kóne túrki jazýyn aýdarýǵa ynta jasap ókrgen bolatyn. Ómiriniń soǵynda sol bastaǵan jumysyn aiaqtap ketti.
Al qulpytastyń betindegi kórinis, bizdiń bertindegi Shyńǵys han zamanynan bastalǵan tarih, qazaq ordasy. Ákem ábden zerttegen, óziniń shyǵarmalaryna arqaý etken tarih.
Qulpytastyń asty jaǵyna qarasańyzdar, Alasapyrandaǵy kók kúimeniń kóshi beinelengen", - dei kele Edige Maǵaýin jyraýlar poeziiasynan da beineler qosylǵanyn, quran aiaty ne úshin jazylǵanyn jáne qazaq oiýlary salynǵanyn aityp ótti.
Qulpytastyń aldynda aq mármár taspen kitap jasalǵan. Oǵan jazýshynyń aitqan sózi jazylǵan eken. Edige Maǵaýinnyń sózinshe eskertkish tasty Túrkiiada jasatqan.
Foto: Saparbek Naǵashybek Facebook-paraqshasynan
Muhtar Maǵaýin – qazaqtyń kórnekti jazýshysy, tarihshy ári ádebiettanýshy ǵalym. Maǵaýin 1940 jyly 2 aqpanda qazirgi Abai oblysy aýmaǵyndaǵy Shubartaý óńirinde dúniege kelip, 2023 jyly 9 qańtarda AQSh-ta dúnie saldy.
