AQSh-ta koronavirýs juqtyrý jaǵdailarynyń sany artýda, demalys kúnderi antirekord ornady. Izrailde myńdaǵan adam úkimetten ótemaqy talap etip kóshege shyqty, dep habarlaidy BBC agenttigi.
Djons Hopkins ýniversitetiniń málimeti boiynsha Covid-19 indetine shaldyqqandar sany álemde 13 mln adamǵa jýyqtady. 565 myńnan astam naýqas qaitys boldy.
Maska taqqan Tramp jáne AQSh-taǵy jańa antirekord
AQSh prezidenti Donald Tramp pandemiia kezeńinde alǵash ret kameraǵa maskamen tústi. Bul senbi kúni boldy. Bul kúni elde 66 myń adam aýrý juqtyryp, kezekti rekord jańardy.
Tramp senbi kúni Vashington mańyndaǵy Ýolter Rid áskeri aýrýhanasyna jaraqat alǵan áskeri lermeen jáne Covid-19 juqtyrǵan patsientterdi kútetin meditsinalyq qyzmetkerlermen kezdesýge bardy.
BAQ Tramptyń kómekshileri prezidentten kópshilik aldynda maska taǵýdy suraǵanyn habarlady. Alaida ol mitingilerde, baspasóz konferentsiialarynda jáne basqa da kópshilik qatysatyn is-sharalarda maska taǵýdan bas tartqan bolatyn.
AQSh indetke shaldyqqandar sany boiynsha álemde kósh bastap tur. Munda 3 millionnan astam adam koronavirýs juqtyrsa, 132,3 myń adam kóz jumǵan.
Resei men Britaniiadaǵy jaǵdai
Reseide ótken táýlikte 6615 adamnan koronavirýs anyqtalyp, 130 patsient kóz jumǵanyn indetpen kúres jónindegi jedel shtab habarlady. Reseide virýs taralǵaly beri 727 myń adam aýyrǵan (álem boiynsha 4-orynda), 11335 naýqas qaitys bolǵan.
Ulybritaniiada senbi kúni basseinder men ashyq aspan astyndaǵy teatrlar, sondai-aq kriket oinaýǵa arnalǵan alańdar ashyldy. Elde qoǵamdyq oryndarda maskalardy mindetti túrde taǵý týraly daý áli de jalǵasýda. Ázirge bilik mindetti sharalar engizbeitinderin málimdedi.
Álemdegi ahýal
Úndistanda virýs juqtyrǵandar sany 820 myń adam boldy. Jeksenbi kúni áigili úndi aktrisalarynyń biri Aishvariia Rai, onyń kúieýi men qyzy koronavirýsqa shaldyqqany belgili boldy.
Úndistan aýrý juqtyrǵandar sany boiynsha álemde AQSh pen Braziliiadan (1,8 mln) keiingi úshinshi, al qaitys bolǵandar sany boiynsha segizinshi orynda tur.
Jalpy Latyn Amerikasyndaǵy jaǵdai áli de máz emes. Latyn Amerikasynyń tórt memleketi Braziliia, Perý, Chili jáne Meksika aýrý kórsetkishteri eń nashar álemdegi elderdiń alǵashqy ondyǵyna kirdi.
