AQSh-ta koronavirýs juqtyrǵandar kóbeiip barady. Bilik shekteý sharalaryn birtindep kúsheitip jatyr. Al Eýropada lokdaýnnyń arqasynda virýstyń taraýy sál báseńdedi.
COVID Tracking Project jobasynyń málimeti boiynsha, sońǵy aptada AQSh-ta kúnine ortasha eseppen 150 myń adamnan koronavirýs anyqtalǵan. Kún saiyn 73 myń naýqas aýrýhanaǵa jatqyzylady, 14 myńy reanimatsiia bólimine túsedi.
Sarapshylar koronavirýstan qaitys bolǵandar arta beredi dep boljaidy. Qazir bir táýlik ishinde shamamen 1100 adam ólimi tirkelip júr.
Keibir aimaqta bilik shekteý sharalaryn qaitadan engize bastady. Turǵyndardyń maska taǵýy ádepki kóriniske ainalǵan. Densaýlyq saqtaý salasynyń mamandary Rizashylyq bildirý kúnine (26 qarasha) arnalǵan sharalar jaǵdaidy ýshyqtyrýy múmkin dep qaýiptenedi.
Al Eýropada engizilgen shekteý sharalary tiimdiligin dáleldegen. Sonyń arqasynda keibir elderde infektsiianyń taraýy báseńdegen, alaida jańa naýqas pen adam ólimi kórsetkishi joǵary kúiinde qalyp otyr. Aýrýhana qyzmetkerlerine aýyr salmaq túsken.
Djons Hopkins ýniversitetiniń málimetinshe, Italiia, Ulybritaniia, Germaniia, Ispaniia, Frantsiiada koronavirýs juqtyrǵandar qarasha aiynyń basyndaǵy kórsetkishpen salystyrǵanda azaiǵan. Degenmen Eýropa úkimeti tumaý-syrqaý jiileitin qysqy maýsymda saq bolý qajettigin aitady.
