Sársenbi kúni AQSh-ta respýblikashyldar men demokrattardyń birneshe ókili tsentristik baǵyttaǵy jańa partiia qurǵanyn málimdedi. Bul jóninde Reuters agenttigi habarlady.
Jańadan qurylǵan "Forward" (Alǵa) partiiasyna Niý-Djersi gýbernatory burynǵy respýblikashyl Kristin Todd Ýitman jáne buryn demokrattar atynan prezidenttikke úmitker bolýǵa talpynǵan kásipker Endriý Iang jetekshilik etedi.
Olar respýblikashyldar men demokrattardan kóńili qalǵan amerikalyqtarǵa balama partiia usynǵysy keletinin málimdedi. Ázirge partiianyń baǵdarlamasy joq, biraq uiymdastyrýshylar onyń tsentristik baǵytta bolatynyn aitady. Negizgi maqsaty – "ádil, gúldengen ekonomika qurý" jáne "amerikalyqtarǵa sailaý kezinde kóbirek kandidat usyný, memlekettiń bolashaǵyna qatysty máseleler boiynsha sheshim qabyldaýda halyq únin kóbirek jetkizý".
Jańa partiia birneshe jyl buryn respýblikashyldar men demokrattar qurǵan qoǵamdyq qozǵalystar negizinde qurylǵan. Olardyń oiynsha, jańa partiianyń bolashaǵy zor, sebebi eldegi úsh azamattyń ekeýi elge úshinshi partiia kerek dep sanaidy.
Jańa partiia ókilderi 2024 jylǵy prezident sailaýyna deiin saiasi uiymdy barlyq shtatta tirkelip, prezidenttikke kandidatyn usyna alamyz dep úmittenedi. Olar jergilikti sailaýlarǵa da qatysýdy josparlap otyr.
Osy ýaqytqa deiin AQSh-ta úshinshi partiia qurý talpynystarynyń barlyǵy sátsiz aiaqtalǵan. 1995 jyly milliardar Ross Pero reforma partiiasyn quryp, prezident sailaýynda sailaýshylardyń on paiyz daýysyn alǵan.
Reuters-tiń jazýynsha, keibir saiasatker-demokrattar jańa partiia qurý ideiasyn synap, saiasi uiymdy respýblikalyqtarǵa jeńis áperýge kómektesýi múmkin dep qaýiptengen.
