AQSh-tyń Oregon jáne Vashington shtattarynda 76 adam qalyptan tys ystyqtyń qurbany boldy, al deneniń qyzyp ketýine bailanysty aýrýhanaǵa jatqyzylǵandardyń sany júzdep sanalady, dep habarlaidy QazAqparat The Wall Street Journal gazetine silteme jasap.
Basylymnyń málimetinshe, tek Oregon shtatynda deneniń qyzyp ketý saldarynan 63 adam qaitys boldy.
«Bul naǵyz densaýlyq daǵdarysyna ainaldy. Qalyptan tys ystyqtyń ólimge aparyp soǵatynyn kórsetti», – deidi Maltnoma okrýginiń (Oregon) Densaýlyq saqtaý departamentiniń ókili doktor Djennifer Vains. «Bizdiń jaqta jaz budan da qatty ysidy, sondyqtan bul jaǵdai áli de qaitalanady dep oilaimyn».
Portlendta jáne shtattyń basqa da qalalarynda osy aptada temperatýra 46 gradýsqa deiin kóterildi. Kórshiles Vashington shtatynda sál salqyndaý boldy, onda ystyq saldarynan bolǵan 13 ólim rastaldy. Kóz jumǵandar 44-ten 97 jasqa aralyǵynda. Olardyń óliminiń sebebi gipertermiia –deneniń ystyqty jeńe almaityndai qyzyp ketýi.
Vashingtonnyń meditsina basqarmasy aptap saldarynan ózin nashar sezingen 1 648 adamǵa shuǵyl barǵandary týraly habarlady. 358 jaǵdaida adamdar statsionarlyq emdelýge jiberildi.
AQSh Ulttyq meteorologiialyq qyzmetiniń boljamyna sáikes, eldiń batys jaǵalaýyndaǵy qalyptan tys ystyq taǵy birneshe kúnge sozylady.
