AQSh senatynyń músheleri respýblikashyl Lindsi Grem men demokrat Robert Menendes Reseige qarsy jańa sanktsiialar jobasyn ázirledi. Shekteý sharasy Reseidiń ózge elderdegi sailaýlarǵa aralasý yqtimaldyǵyna jáne Ýkrainadaǵy jaǵdaiǵa bailanysty qabyldanbaq.
Qujat reseilik birqatar bankter, energetika kompaniialary men Reseidiń táýelsiz boryshyna qyzmet kórsetetin júielerge shekteý engizýdi kózdeidi dep habarlaidy Reuters. Agenttiktiń jazýynsha, sanktsiiaǵa suiytylǵan tabiǵi gazǵa qatysty reseilik jobalar da iligýi múmkin.
Jýrnalisterdiń málimetinshe, AQSh senatorlary Resei prezidenti Vladimir Pýtinmen bailanystaǵy jáne jemqorlyqqa qatysy bar jeke tulǵalarǵa qarsy shekteý engizýdi de usynǵan.
Zań jobasynda Kerch buǵazynda ýkrainalyq áskeri kemelerge shabýyldap, basyp alǵany úshin Resei federaldyq qaýipsizdik qyzmetiniń (FSB) 24 qyzmetkerine qarsy sanktsiia engizý qarastyrylǵan.
Grem men Menendes buǵan deiin ótken jyly jazda Máskeýge qarsy sanktsiia engizýdi usynǵan. Ol joly qabyldanbai qalǵan zań jobasynda Resei memlekettik qaryzyn satyp alýǵa shekteý qoiý, reseilik bankterdiń AQSh-taǵy shottaryn buǵattaý tárizdi sharalar qarastyrylǵan edi. Bul joly senatorlar burynǵydan da qatań usynystar jasap otyr dep habarlaidy Reuters.
AQSh senatorlarynyń bastamasy týraly habarlardan keiin Máskeý birjasynda rýbldiń dollar men eýroǵa shaqqandaǵy baǵamy arzandaǵan.
12 aqpanda BAQ Eýropa odaǵy men AQSh Reseige qarsy jańa sanktsiialar ázirlep jatqany, shekteý sharasy Reseidiń ótken jyly qarashada Qyrym jaǵalaýy mańynda "shekaradan zańsyz ótken" degen syltaýmen Ýkrainanyń áskeri kemeleri men 24 teńizshisin ustap alǵanyna bailanysty engiziletini týraly habarlaǵan.
Resmi Kiev Reseidiń is-áreketin agressiialyq akti dep baǵalady jáne óz teńizshilerin áskeri tutqyndar dep ataidy. Resei biligi ýkrain teńizshileri qasaqana arandatýǵa bardy dep málimdegen. Máskeýdiń pikirinshe, Resei men Ýkraina bir-birimen soǵysyp jatpaǵandyqtan teńizshilerdi áskeri tutqyn deýge kelmeidi.
