Qazaqstan Respýblikasy Prezidentiniń AQSh-qa sapary boiynsha QR Parlamenti Senatynyń tóraǵasy Qasym-Jomart Toqaev pikir bildirdi, dep habarlaidy "Ult aqparat" Baq.kz agenttigine silteme jasap.
Bul týraly Senat tóraǵasy Qasym-Jomart Toqaev óziniń tvitterdegi paraqshasynda jazdy.
«Donald Tramp Qazaqstandy Korei túbegin denýklearizatsiialaý jónindegi áriptesi dep atady. Tarihi mańyzdy sapar!» - dedi Qasym-Jomart Toqaev.
Sonymen qatar, ol Nursultan Nazarbaevtyń Aq úidegi kelissózderi Qazaqstan men AQSh-tyń ekijaqty yntymaqtastyqty damytý jáne halyqaralyq jaǵdailar máseleleri jónindegi ustanymdarynyń uqsas ekenin kórsetetinin aitty.
«Prezident Nursultan Nazarbaevty Vashington airyqsha yqylaspen qabyldap, Donald Tramp «zor qurmetke ie» lider dep atady. Óz elinde de, halyqaralyq qoǵamdastyqta da eńbegi elengen Qazaqstan kóshbasshysyna laiyqty baǵa berildi», - dedi Senat spikeri.
Esterińizde bolsa, Qazaqstan Prezidentiniń biylǵy 16-18 qańtarda Amerika Qurama Shtattaryna resmi saparmen baratyny týraly habarlaǵan bolatynbyz. Onda Nursultan Nazarbaev AQSh prezidenti Donald Tramppen, sondai-aq AQSh-tyń resmi jáne isker toptar ókilderimen kezdesý ótkizedi dep josparlandy. Qazaqstan Respýblikasy Prezidentiniń baspasóz qyzmeti Nursultan Nazarbaevtyń AQSh-qa barǵan sátinen video jariialady. Elbasyn Donald Tramptyń ózi qarsy alyp, muny úlken mártebege balady.
Aq úide ótken kezdesýde Nazarbaev Qazaqstan men AQSh arasynda árdaiym ekijaqty saiasi qarym-qatynas ornaǵanyn aityp ótti. Budan keiin Memleket basshysy AQSh-tyń isker toptar ókilderi, AQSh-tyń energetika ministri jáne «Sheteldik jeke investitsiialar jónindegi Korporatsiia» memlekettik agenttiginiń prezidentimen kezdesti. Sapar sońynda Nazarbaev Tramppen júrgizgen kelissózdiń qorytyndysy boiynsha BAQ úshin brifing ótkizdi.
