AQSh Qarjy ministrligi Resei prezidenti Vladimir Pýtinmen jaqyn bailanys ornatqan, bolashaqta AQSh sanktsiiasyna iligýi ábden múmkin delingen reseilikterdiń tizimin jariialady. Associated Press agenttiginiń habarlaýynsha, «Kreml esebi» dep atalatyn tizimde Resei biliginiń joǵary shendi 114 saiasi ókili men 96 oligarh bar, dep jazady Azattyq.
Prezident Donald Tramp ákimshiligi osylaisha Kongrestiń Reseidi 2016 jyly eldegi prezident sailaýyna kilikkeni úshin jazalaý talabyn jartylai bolsa da oryndady. Biraq Aq úi Máskeýdiń "AQSh sailaýyna kilikkeni úshin" ázirge tizimdegilerdiń eshqaisysyna sanktsiia salynbaitynyn málimdedi. Amerikalyq keibir kongresmender prezident Donald Tramp Kongress sanktsiia salmaq bolǵan keibir reseilikterge shekteý qoimai, «prezident Reseige qatysty tym jumsaq saiasat ustanyp otyrǵan joq pa?» degen kúdikti kúsheite túskenin aitady.
Tizim Pýtinniń biligine bolysyp, odan paida kóredi delingen saiasi elita ókilderin áshkereleý maqsatynda jasalyp otyr. Bul tizimge ilingenderge AQSh sanktsiiasy salynbaǵanymen, tizimde buǵan deiin de sanktsiia salynǵan reseilikter bar.
«Pýtinniń tizimi» dep atalǵan beiresmi tizimge Resei úkimetiniń músheleri, onyń ishinde premer-ministr Dmitrii Medvedev, Pýtinniń 42 kómekshisi, Federaldyq qaýipsizdik qyzmeti (FSB) men Bas barlaý basqarmasynyń (GRÝ) basshylary ilikken. Oligarhtar men biznesmenderden tizimge ilikkender qatarynda Alisher Ýsmanov, Roman Abramovich, Sýleiman Kerimov jáne "Kasperskii laboratoriiasy" kompaniiasyn qurǵan Evgenii Kasperskii tur.
