Amerika biligindegiler AQSh-tan reseilik 35 mámilegerdi elden shyǵaryp, jumadan beri Reseidiń Merilend pen Niý-Iork shtatyndaǵy eki mámilegerlik ókildikti jaýyp jatyr, - dep habarlaidy Reuters agenttigi AQSh ákimshiligindegi joǵary qyzmettegi sheneýnikke silteme jasap.
Joǵary qyzmettegi sheneýniktiń aitýynsha, Resei azamattary 72 saǵat ishinde AQSh aýmaǵynan ketýi tiis.
Al RIA Novosti málimetinshe, AQSh prezidenti Barak Obama elden shyǵarylyp jatqan mámilegerlerdi "barlaýshylar" dep ataǵan. Barak Obamanyń aitýynsha, AQSh-taǵy eki mámilegerlik ókildik eldegi jaǵdaidy barlaý úshin qoldanylyp júrgen.
29 jeltoqsanda, beisenbide Barak Obama Reseige qatysty jańa sańktsiialar týraly qaýlyǵa qol qoidy. AQSh qarjy ministrliginiń málimetinshe, sanktsiia Reseidegi alty adam men bes vedomstvo úshin engizilip otyr. Olardy amerikalyq júielerge kibershabýyl jasady dep aiyptap otyr. Aita keteiik, tizimdegi alty adamnyń ishinde Bas barlaý basqarmasynyń basshysy Igor Korobov, birinshi orynbasarlar Vladimir Alekseev pen Igor Kostiýkov, orynbasar Sergei Gizýnov, Aleksei Belan men Evgenii Bogachev bar.
Sonymen qatar, Barak Obama bul sanktsiialardyń "AQSh-ta ótken sailaýǵa aralasqandarǵa" jaýap retinde engizilgenin málimdedi.
Aita keteiik, qaýly boiynsha, sanktsiiadaǵy tizimge engizilgen jeke tulǵalardyń múligine tyiym salynatyn bolady.
