Foto: dw.com
AQSh Máskeýdi Strategiialyq shabýyl qarýlaryn shekteý týraly shart erejelerin oryndaýdan ainyp, tekserýge ruqsat bermei otyr dep aiyptady. Bul týraly Azattyq radiosy habarlady.
AQSh memlekettik departamenti málimdemesinde "Reseidiń tekserý qyzmetine kómektesýden bas tartýy AQSh-qa kelisim boiynsha mańyzdy quqyqtardy júzege asyrýǵa múmkindik bermeidi jáne Amerika men Reseidiń iadrolyq qarýdy baqylaý múmkindigine qater tóndiredi" dep jazǵan.
AQSh memlekettik departamenti ókiliniń aitýynsha, Reseidiń áli de shartqa oralýyna múmkindigi bar. "Vashington onymen burynǵysha shart boiynsha jumys isteýge daiyn" dedi departament ókilderi.
Máskeý men Vashington New START kelisimi boiynsha tekserýdi jalǵastyrý týraly kelissózdi qarashada júrgizýi kerek bolǵan. Biraq Resei kezdesýdi shegergen jáne taraptar áli kúnge deiin jańa merzim belgilegen joq.
Reuters-tiń jazýynsha, atalǵan shart qyrǵiqabaq soǵysy aiaqtalǵaly bergi eki eldiń iadrolyq qarýyn baqylaýǵa arnalǵan mańyzdy tetik sanalady. New START 2011 jyly kúshine engen jáne 2021 jyly taǵy bes jylǵa sozylǵan. Ol AQSh pen Reseidiń iadrolyq oqtumsyqtarynyń sanyn shektep otyrady.
Resei men AQSh-tyń iadrolyq arsenaly álemdegi iadrolyq oqtumsyqtardyń jalpy sanynyń 90 paiyzyndai bolady. Reseidiń Ýkrainaǵa basqynshylyǵy bastalǵaly beri Máskeý men Vashingtonnyń qarym-qatynasy keiingi 20-30 jyl ishinde bolyp kórmegen tómen deńgeige tústi. Bul Amerika prezidenti Djo Baiden ákimshiligine Reseimen aradaǵy kelisimderdi saqtap, jalǵastyrýdy qiyndatyp jiberýi múmkin.
Tamyz aiynda Máskeý Batystyń basqynshylyqtan keiin salǵan shekteýlerin alǵa tartyp, joǵaryda atalǵan kelisim aiasynda tekserý júrgizý boiynsha áriptestikti toqtatqan. Degenmen Resei biligi burynǵysha kelisimniń sharttaryn oryndaýǵa qulyqty ekenin jetkizgen.
Resei biligi Batys elderin Ýkrainadaǵy jaǵdaidy ýshyqtyrdy dep aiyptaidy. Reseidegi sheneýnikterdiń keibiri "iadrolyq qarý paidalanamyz" dep ashyq qoqan-loqy kórsetken.
Osy aptada Resei AQSh-qa kelisimniń merzimi 2026 jyly bitýi múmkin ekenin eskertip, qaita uzartylmaitynyn aitqan. Sebebi, Máskeýdiń túsindirýinshe, Vashington "strategiialyq soqqy" jasaiyn dep otyr.
