AQSh derekterine qaraǵanda, Resei Ýkrainanyń shyǵysynda "Lýgansk halyq respýblikasy" (LHR) jáne "Donetsk halyq respýblikasy" (DHR) dep ózin ózi jariialap alǵan separatistik qurylymdardy anneksiialaýdy, buǵan qosa Ýkrainanyń Herson oblysynda "Herson halyq respýblikasy" deitin taǵy bir separatistik qurylym jariialaǵannan keiin, onyń "táýelsizdigin" moiyndaýdy josparlap otyr, dep habarlaidy Azattyq.
Bul týraly dúisenbide AQSh-tyń Eýropadaǵy qaýipsizdik jáne yntymaqtastyq uiymyndaǵy elshisi Maikl Karpenter AQSh barlaýy málimetine súienip málimdedi. Máskeý "separatister baqylaýyndaǵy Lýgansk ári Donetsk oblystarynda jalǵan referendýmdar ótkizbekshi, sóitip olardy Reseige qosyp almaqshy" dep habarlady Karpenter. Onyń sózinshe, Máskeý Ýkrainanyń Herson oblysynda "táýelsizdik" jóninde daýys berýdi uiymdastyrýdy ázirlep jatqanyn ańǵartatyn belgiler de bar.
"Biz demokratiialyq jáne sailaý zańdylyǵyn kózboiaýshylyq jasaýǵa paidalanýdy kóksegen Kreml jasandy referendýmdar ótkizýge tyrysýy múmkin dep sanaimyz... Mundai jalǵan referendýmdar, burmalanǵan "daýys berý qorytyndylary" zańdy dep moiyndalmaidy, Ýkraina jerin qosymsha anneksiialaýdy kózdeitin kez-kelgen umtylys ta zańdy dep moiyndalmaidy", - dep málimdedi Karpenter.
Onyń sózinshe, mundai talpynys mamyrdyń ortasynda jasalýy múmkin. Resei áskeri ózi basyp alǵan aýmaqtaǵy jergilikti mektepterde Resei mektepterine arnalǵan oqý baǵdarlamasyn engizý jospary, qalalar merleri men jergilikti keńester músheleriniń urlanýy, olardy internet pen uialy bailanys jelisinen ajyratý álgindei jospar baryn meńzeidi.
