AQSh professory «Týǵan jer» jobasy aiasynda Aqtóbedegi meditsina mekemesine quny 15 mln bolatyn qural-jabdyqtardy tartý etti, dep habarlaidy "Ult aqparat" oblys ákiminiń baspasóz qyzmetine silteme jasap.
Aqtóbe oblysynyń ákimi Berdibek Saparbaev meditsina qyzmetkerleriniń «Politravma. Diagnostika men keshendi emdelýdiń zamanaýi kontseptsiialary» taqyrybyndaǵy halyqaralyq konferentsiiasynyń qatysýshylarymen kezdesti. Konferentsiiaǵa AQSh, Ońtústik Koreia, Germaniia, Resei, Qytai, Túrkiia elderinen kelgen professorlar, hirýrg-dárigerler, travmatologtar qatysty. Sheteldik áriptesterimen tájiribe almasý úshin travmatologiia salasyndaǵy otandyq mamandar da keldi. Konferentsiia aiasynda aýyr patologiiasy bar patsientterge keńester berilip, aty álemge áigili mamandar kórneki operatsiialar júrgizdi.
Kezdesýdi ashqan oblys basshysy konferentsiia qonaqtaryna, sondai-aq Qazaqstannyń týmasy, Sent-Lýis qalasyndaǵy Meditsina ýniversitetiniń ortopediia klinikasynyń basshysy - professor Joldas Quljanovqa memleket basshysynyń bastamasymen qolǵa alynǵan «Týǵan jer» patriottyq jobasyna at salysyp, Jedel meditsinalyq járdem aýrýhanasynyń travmatologiia bólimine 15 million turatyn qural-jabdyqtardy tartý etkeni úshin alǵysyn bildirdi.
Konferentsiia taqyrybynyń ózektiligi atalyp ótti, óitkeni politravma kezindegi meditsinalyq kómekti uiymdastyrý máselesin sheshýdiń áleýmettik-ekonomikalyq mańyzy zor. Statistikalyq málimetterge sáikes, zaqym alý júrek-qan tamyrlary jáne onkologiialyq aýrýlarmen qatar, Qazaqstan halqynyń ólimine ákelip soǵatyn úsh negizgi sebepterdiń biri bolyp tabylady. Al 40 jasqa deiingiler arasynda birinshi orynda. Aqtóbede jáne jalpy respýblikada kóptegen aldyn alý sharalary ótkizilýde. 2016 jyly Aqtóbe qalasyndaǵy Jedel meditsinalyq járdem aýrýhanasy janynan politravma bóliminiń negizi qalandy. Oblystyń shalǵai aýdandaryna sanaviatsiia jelisi boiynsha jemisti qoldanylyp júrgen kómek kórsetýdiń zamanaýi qaǵidalary engizildi.
- Meditsinadaǵy jańa baǵyttardyń ári qaraiǵy damýynyń biz úshin meditsinalyq-áleýmettik mańyzy zor, jáne biz álemdegi jetekshi klinikalardyń sizder sekildi ókilderimen birlese sheberlik sabaqtaryn, seminarlar ótkizip, mamandarymyzdy tájiribelik úiretýde seriktes bolýǵa qyzyǵýshylyq tanytamyz,-degen óńir basshysy budan buryn Ońtústik Koreia, Túrkiia, Resei, AQSh jáne Izraildiń dárigerlerimen memlekettik-jeke seriktestiktiń mehanizmderi men meditsinalyq klasterlerdi qalyptastyrý aiasynda kelisimsharttarǵa qol qoiylǵandyǵy týraly aitty.
Óz kezeginde, Aqtóbedegi meditsinalyq klinikalarmen tanysyp, aqtóbelik áriptesterimen tildesip úlgergen sheteldik qonaqtar da jyly shyrai tanytyp qarsy alǵandary úshin alǵystaryn bildirip, ákimniń meditsina salasyndaǵy yntymaqtastyqty keńeitý týraly usynysyn bir aýyzdan qoldady.
Aqtóbe oblysynyń densaýlyq saqtaý salasy qýatty resýrstyq bazaǵa ie ekendigi atalyp ótti. Aqtóbe elimizdiń batys óńirleri arasynda meditsinalyq týrizmniń ortalyǵy bolyp tabylady, al oblystyq klinikalyq aýrýhana – Qazaqstannyń transplant ortalyqtarynyń tizimine kirgen batys óńirlerindegi birden bir mekeme.
Kezdesý oblys ákimdigi men Uiǵyr avtonomiialyq aýdanynyń Sintszian halyqtyq aýrýhanasynyń ókili - meditsina professory Miao Hýangang pen Sent-Lýis ýniversitetiniń ortopediialyq gospitaliniń ókili professor Joldas Quljanov arasynda memorandýmǵa qol qoiýmen aiaqtaldy. Kelisimshartqa sáikes, taraptar dárigerlerdi tájiribelik úiretýde, sheberlik sabaqtaryn, lektsiialar men seminarlar ótkizýde, sonymen qatar, patsientterge keńes berýde yntymaqtastyqty damytatyn bolady.
- Aqtóbelik klinikalar eń jańa meditsinalyq tehnikalarmen jabdyqtalǵan. Búginde, memleket basshysynyń tapsyrmasyna sáikes, bizdiń eń birinshi mindetimiz – joǵary bilikti mamandardy daiarlaý. Osyǵan bailanysty qol qoiylǵan memorandým meditsinamyzdyń igiligine jumys jasaityn bolady,-dedi Berdibek Saparbaev.
