Nursultan Nazarbaevty Amerika Qurama Shtattarynyń Prezidenti Donald Tramp quttyqtady, - dep habarlaidy "Ult aqparat" Aqordaǵa silteme jasap.
Tramp Amerika halqy atynan Nursultan Nazarbaevty jáne Qazaqstan halqyn Ortalyq Aziiada alǵash ret uiymdastyrylyp otyrǵan Halyqaralyq "EKSPO-2017" mamandandyrylǵan kórmesiniń ótkizilýimen quttyqtady.
AQSh Prezidenti osy jahandyq sharanyń arqasynda Qazaqstannan jáne dúnie júziniń túkpir-túkpirinen keletin milliondaǵan qonaqtar adam qiialynan nár alatyn tehnologiialyq innovatsiia men 115-ten astam ulttyq pavilondarda kórinis tapqan tamasha áriptestik álemine kýá bolatynyn aitqan.
"Amerika Qurama Shtattary Astanadaǵy "EKSPO-2017" kórmesine qatysyp, Amerikanyń energetika, ǵylym jáne tehnologiia salalaryndaǵy úzdik jetistikterin, sondai-aq san qyrly mádenietimizdi kórsetýdi zor mártebe sanaidy", - delingen hatta.
Sondai-aq, Tramp AQSh pavilony ótken shirek ǵasyrda elderimiz nyǵaita túsken strategiialyq seriktestiktiń mańyzdy nyshany bolyp sanalatynyn jáne onyń Qurama Shtattardyń aldaǵy ýaqytta da óńirdegi beibitshilikti, turaqtylyq pen ósip-órkendeýdi qoldaýǵa degen nietin bildiretinin atap ótti.
"Prezident myrza, "EKSPO-2017" kórmesi arqyly energetikalyq qaýipsizdik máseleleri jónindegi jahandyq dialogty odan ári ilgeriletýdegi Sizdiń kózqarasyńyz ben kóshbasshylyǵyńyz úshin Sizge jáne Qazaqstanǵa iltipatymdy bildiremin. Ózara syilastyq pen ortaq múddege negizdelgen AQSh-Qazaqstan arasyndaǵy strategiialyq seriktestik odan ári nyǵaia túsedi dep senemin", - delingen hatta.
