Elbasy Nursultan Nazarbaev Amerika Qurama Shtattarynyń Prezidenti Donald Tramppen telefon arqyly sóilesti, dep habarlaidy "Ult aqparat" Aqordaǵa silteme jasap.
Áńgimelesý barysynda Donald Tramp Qazaqstan Prezidentin Astanadaǵy «EKSPO-2017» halyqaralyq kórmesiniń tabysty ótýimen quttyqtap, Amerika delegatsiiasynyń osy is-sharaǵa qatysýynyń nátijelerin joǵary baǵalady.
Memleket basshysy Nursultan Nazarbaev Tehas shtatyndaǵy ondaǵan adamnyń ómirin qiǵan tabiǵat apatyna bailanysty kóńil aityp, zardap shekken aýdandardaǵy infraqurylymnyń tezirek qalpyna kelýine jáne jergilikti halyqtyń qalypty tirshilikke qaita oralýyna tilektestigin bildirdi.
Eki el kóshbasshylary biylǵy 21 mamyrda Er-Riiadta ótken «Islam álemi – AQSh» sammiti aiasyndaǵy alǵashqy kezdesýdiń Astana men Vashington arasyndaǵy yntymaqtastyqty nyǵaitý isindegi mańyzdylyǵyn atap ótti.
Nursultan Nazarbaev AQSh Prezidentine biylǵy 10-11 qyrkúiekte Astanada Islam yntymaqtastyǵy uiymynyń ǵylym jáne tehnologiialar jónindegi sammiti ótetinin aitty.
Memleketter basshylary Qazaqstan men Amerika qarym-qatynasynyń jaǵdaiyn jáne onyń damý perspektivalaryn talqylady. Bul rette taraptar ekijaqty saýda-ekonomika salasyndaǵy ózara is-qimyldy nyǵaitý týraly ýaǵdalasty.
Prezidentter óńirlik jáne halyqaralyq kún tártibindegi ózekti máseleler jóninde pikir almasty.
Nursultan Nazarbaev Qazaqstanda biylǵy 29 tamyzda jumysyn bastaǵan Tómen baiytylǵan ýran bankiniń jahandyq qaýipsizdikti nyǵaitýdaǵy mańyzdylyǵyna nazar aýdardy.
Eki el kóshbasshylary Amerika-Resei qarym-qatynastarynyń jaǵdaiyna jeke toqtaldy. Qazaqstan Prezidenti Vashington men Máskeý arasyndaǵy dialogtyń jaqsaratynyna senim bildirdi.
Donald Tramp Nursultan Nazarbaevty Vashingtonǵa resmi saparmen kelýge shaqyrdy.
Memleketter basshylary áńgime sońynda eki jaqtyń da múddeli bolatyn máseleleri jónindegi turaqty dialogty qoldaýǵa nietti ekendikterin bildirdi.
Telefon arqyly sóilesýge AQSh jaǵy bastamashy boldy.
