1 mamyrda AQSh pen NATO Aýǵanstannan áskerin áketýdi resmi túrde bastady. Bul týraly senbide Aq úi men Pentagon ókilderi málimdedi.
Qazir Aýǵanstanda AQSh-tyń 2500-3500, NATO-nyń 7000 áskeri qyzmetkeri bar. Olardyń bári jazdyń sońyna deiin ketýi tiis. Osylaisha Batys kúshteri jiyrma jylǵa jýyq ýaqyttan soń elden birjola ketpek.
AQSh pen "Taliban" kelisimine sáikes shetel kúshteri Aýǵanstannan 1 mamyrǵa deiin ketýge tiis bolǵan. Biraq AQSh prezidenti Djo Baiden tym asyǵys ketý AQSh-tyń jáne odaqtastardyń áskeri kontingentine qaýip tóndiredi dep merzimde keiinge ysyrǵan.
30 sáýir kúni keshke Aýǵanstan ishki ister ministriniń mindetin atqarýshy Haiatýlla Haiat "Taliban" shabýyldaýy múmkin dep qaýipsizdik sharasyn kúsheitti. Sol kúni osy málimdemeniń aldynda Logar aimaǵynyń ákimshilik ortalyǵy Pýli Alamda jarylǵysh zatpen jabdyqtalǵan kólik jarylyp, kemi 26 adam mert boldy, júzden astam adam jaraqattandy. Eshqandai top bul shabýyl úshin jaýapkershilik almady.
Áskeri kúshterdiń elden tolyq ketýinen soń soǵystan sharshaǵan Aýǵanstanda turaqsyzdyqtyń jańa kezeńi bastalýy múmkin degen alańdaýshylyq bar.
