Amerika Qurama Shtattary Qazaqstanǵa vizasyz rejim berýge áli daiyn emes. Bul týraly Qazaqstandaǵy AQSh elshisi Ýiliam Mozer aitty, dep habarlaidy QazAqparat tilshisi.
«Meniń oiymsha, bizdiń el vizasyz rejim berýge áli daiyn emes. Óitkeni bul - óte uzaq ári kúrdeli protsess. Qazirgi pandemiia kezinde de vizalar boiynsha óte kóp shekteý bar», - dedi Mozer AQSh elshiligi uiymdastyrǵan onlain dóńgelek ústelde tilshi suraǵyna bergen jaýabynda.
Sonymen birge, jýrnalister «Qazaqstan azamattary úshin vizasyz rejim engizý týraly kelissózder boldy ma?» degen suraq qoidy.
«Ázirge Qazaqstanmen vizasyz rejim týraly kelissózder bolǵan joq. Qazir Vashingtonda jańa ákimshilik jumys isteidi, mundai suraqtar talqylaýda bolady, biraq dál qazir ákimshilik úshin basqa máseleler basymdyqta bolyp otyr. Degenmen bul bizdiń kelissózder júrgizbeitinimizdi bildirmeidi», - dep jaýap berdi AQSh elshisi.
