Eýropanyń qor naryǵynda baǵa belgileri tómendedi. Batys Eýropanyń STOXX Europe 600 kompaniialar indeksi - 4 paiyzdan asa, nemistiń DAX-y – 2,8 paiyzǵa, frantsiialyq CAC-40 - 4,6 paiyzǵa, britandyq FTSE – 4 paiyzǵa quldilady. Bul jóninde Euronews.com agenttigi habarlady.
Niý-Iork qor birjasynyń basty indeksteri naryq qatysýshylarynyń koronavirýstyń ekinshi tolqynynan qorqýy sebebimen kúrt tómendegen. Dow Jones ónerkásip indeksi 7 paiyzdan astam joǵaltqan – bul ol úshin sońǵy úsh aidaǵy eń nashar kún. Quramyna eń iri 500 kompaniialar kiretin S&P 500 indeksi 6 paiyzdai tómendegen. Nasdaq elektrondy birjasynyń indeksi 2 paiyzdan astam tómendedi.
Eń qatty tómendegen - áýe jelileri, krýiz operatorlary men týroperatorlar, sondai-aq energetikalyq sektordyń baǵa belgileri.
Naryq analitikteri investorlardyń kóńil-kúiine Florida, Tehas jáne Kaliforniia shtattarynda koronavirýs juqtyrý faktileriniń kóbeigeni týraly málimetter áser etkenin aityp otyr.
Taiaýda AQSh-tyń Federaldyq qor júiesi ekonomikany qalpyna keltirý uzaq ýaqytqa sozylatynyn jáne indettiń ekinshi tolqyny bastalsa, karantindi qaita engizýge bolmaitynyn málimdedi. Ótken aptada saýda birjasyna jumyssyzdyq boiynsha járdemaqyny 1,5 mln adam surap keldi.
FQJ boljamynsha, AQSh-tyń jalpy ishki ónimi biyl 6,5 paiyzǵa tómendep, jumyssyzdyq deńgeii 9.3 paiyzdy quraidy. Qazirgi kezde kórsetkish – 13.3 paiyz.
