Eýroodaq Belarýstiń 40 azamatyna prezident sailaýyn burmalady jáne beibit sherýge shyqqan azamattardyń quqyǵyn buzdy dep sanktsiia saldy. Sheshim 1 qazan kúni Eýropa keńesiniń otyrysynda qabyldanyp, ol týraly habarlama 2 qazan kúni Eýroodaqtyń resmi jýrnalynda jaryq kórdi.
Sanktsiia tizimine ilingender qatarynda Belarýs ishki ister ministri Iýrii Karaev pen onyń orynbasarlary, Ortalyq sailaý komissiiasynyń basshysy Lidiia Ermoshina, OMON (politsiianyń arnaiy jasaǵy) komandirleri bar. Tizimge Belarýs ishki áskeriniń qolbasshysy da engen. Aleksandr Lýkashenko tizimde joq. Frantsiia prezidenti Emmanýel Makron Lýkashenkonyń tizimge kirýi Eýropa elderiniń onymen dialog qurýdan bas tartatynyn bildirýshi edi dedi.
Sanktsiia aiasynda aty atalǵan adamdarǵa Eýroodaq elderine barýǵa tyiym salynady, olardy osy elderdegi múlki buǵattalady. Eýroodaq elderiniń azamattaryna jáne kompaniialaryna sanktsiia tizimindegi adamdarmen qandai da qarjy operatsiiasyn jasaýǵa tyiym salynady.
AQSh qarjy ministrligi Belarýstiń segiz azamatyna sanktsiia saldy. Bul týraly mekemeniń saitynda habarlandy. Sanktsiia tizimine Belarýs ishki ister ministri Iýrii Karaev pen onyń orynbasary Aleksandr Barsýkov, Ishki ister ministrligi ishki áskeriniń qolbasshysy Iýrii Nazarenko men onyń orynbasary Hazalbek Atabekov, OMON komandiri Dmitrii Balaba kirdi. Tizimge engender qatarynda Belarýs ortalyq sailaý komissiiasynyń hatshysy Elena Dmýhailo men ortalyq sailaý komissiiasy basshysynyń orynbasary Vadim Ipatov jáne Minsk politsiiasynyń basshysy Ivan Kýbrakov bar.
AQSh qarjy ministrliginiń málimdemesinde sanktsiia tizimine kirgenderdiń "ádiletsiz ótken prezident sailaýyna jáne beibit sherýshilerge zorlyq-zombylyq kórsetýge jaýapty" ekeni aitylady.
Eýroodaq syrtqy ister ministrleri Belarýs sheneýnikterine sanktsiia salý máselesin 28 tamyzdan beri talqylady. Buǵan Belarýs biliginiń beibit sherýshilerdi aiaýsyz janshýy sebep bolǵan. Bastapqyda sanktsiia 21 qyrkúiekte salynýy tiis bolǵan. Alaida 10 qyrkúiek kúni sanktsiianyń belgilengen ýaqytqa salynýy ekitalai ekeni belgili boldy. Ol kezde Kipr bul sheshimge qarsy daýys beretinin aitqan edi. Kipr biligi Eýroodaqtan Jerorta teńiziniń shyǵys bóliginde gaz qorynyń bar-joǵyn barlap jatqan Túrkiiaǵa sanktsiia salýdy surap keledi.
21 qyrkúiek kuni Eýroodaq syrtqy ister ministrleri Lýkashenko Belarýstiń zańdy prezidenti dep sanamaýǵa kelisti, biraq sanktsiia tizimi boiynsha ortaq sheshimge kele almady. 1 qyrkúiek kúni Kiprdiń Eýroodaqtaǵy delegatsiiasy sanktsiiany buǵattaýyn toqtatty.
Resei syrtqy ister ministrliginiń ókili Mariia Zaharova Eýroodaqtyń sanktsiiasy jóninde málimdeme jasap, Belarýstiń Eýroodaq sheneýnikterine qarsy qarymta sanktsiiasy Reseige de taraitynyn aitty. Zaharov muny Reseidiń "odaqtyq mindettemelerimen" túsindirdi. Resei syrtqy ister ministrligi Eýroodaq sheshimin "Belarýs biligine ashyqtan-ashyq qysym kórsetý" dep atady.
