Álemniń birneshe elinde koronavirýs indetine bailanysty engizilgen karantindik sharalardy aiyptaǵan narazylyq aktsiialary ótti. AQSh-tyń birneshe shtatynda azamattar jumys oryndaryn qaita ashyp, shekteý sharalaryn jumsartýdy talap etti.
Narazylardy prezident Donald Tramp qoldady. Onyń pikirinshe, keibir shtat gýbernatorlary qatań sharalar qoldanyp, "tym asyra siltep jibergen" Alaida shekteý sharalaryn jumsartqan keibir shtattarda koronavirýs juqqan adamdar sany ulǵaiǵan.
Koronavirýs juqtyrǵandar sany boiynsha AQSh álemde birinshi orynda tur. Munda 800 myńnan astam adamnan virýs tabylǵan. 43 myńnan astam adam qaitys bolǵan.
Vashington shtatynyń gýbernatory Trampty ótkir synap, million adamnyń ómirine qaýip tóndirip, turǵyndar arasynda alaýyzdyq qozdyrdy dep aiyptady.
Braziliiada da karantinge qarsy mitingiler ótti. Ony prezident Jair Bolsonarý qoldady. Narazylyq sharalarynyń birinde prezident jastardy shekteý sharalaryna qaramastan jumysqa oralýǵa shaqyrdy.
Braziliiada 41 myńnan astam adamnan koronavirýs tabylǵan. 2,5 myńǵa jýyq adam qaitys bolǵan.
Soltústik Osetiiada (Resei) jaqynda júzden astam adam kóshege shyǵyp, narazylyq ótkizgen. Kóbi tabysynan airylyp, otbasyn qalai asyraitynyn bilmeitinin aityp shaǵymdanǵan.
Politsiia miting uiymdastyrýshysyn eki aiǵa qamady. Jergilikti aqparat quraldarynyń jazýynsha, onyń ústinen "jalǵan aqparat taratý" jáne "bilik ókiline kúsh kórsetý" baby boiynsha qylmystyq is qozǵalǵan. Soltústik Osetiiada úkimet úiiniń aldynda sol kúni 69 adam ustalǵan.
Resei oppozitsiiasy sáýir aiynyń sońynda qarsylyq aktsiiasyn ótkizýdi josparlap otyr. Olar koronavirýs indeti kezinde halyqqa qarjylai kómek kórsetýdi talap etedi.
Sońǵy málimet boiynsha, Reseide 53 myńnan astam adamnan koronavirýs tabylǵan. 456 adam qaitys bolǵan.
Álemde koronavirýs juqtyrǵandar sany 2.5 millionnan asty. 175 myń adam qaitys boldy.
