AQSh pen Braziliiada koronavirýs juqqandar sany sál azaiǵanmen áli kúnine on myńdaǵan naýqas anyqtalyp jatyr. Virýspen bailanysty adam ólimi myńnan túspedi.
Braziliia 19 tamyzda bir kúnde 47 myńnan astam adamnan koronavirýs anyqtalǵanyn, 1200-den astam qaitys bolǵanyn habarlady. Al AQSh-ta bir kúnde 44 myńnan astam jańa naýqas anyqtaldy, 1300-den astam adam qaitys boldy. Elde Covid-ke shaldyqqandar 5,5 mln adamǵa jetti, 173 myń adam ólimi tirkeldi. Braziliiada koronavirýs juqqandar 3,4 mln-ǵa jetti, adam ólimi 110 myń boldy.
Virýs juqtyrǵandar sany jaǵynan álemde úshinshi orynda turǵan Úndistanda 2,7 mln adamnan koronavirýs anyqtalǵan, shamamen 53 myń adam ólimi tirkelgen.
Odan keiingi orynda turǵan Reseide resmi málimet boiynsha, 935 myń adamnan koronavirýs anyqtalǵan, 16 myń adam ólimi tirkelgen.
Ortalyq Aziiada koronavirýs juqtyrǵandar sany jaǵynan Qazaqstan birinshi orynda tur. Sońǵy ýaqytta munda virýs juqtyrǵandar azaiǵanmen belgileri koronavirýsqa uqsaityn pnevmoniiaǵa shaldyqqandar qatary azaimaǵan. Densaýlyq saqtaý ministrligi pnevmoniianyń ýshyǵýyn karantin sharalarynyń álsireýimen bailanystyrmaýǵa keńes bergen.
Qyrǵyzstanda koronavirýs juqtyrǵandar 42 325-ke jetken, basym bóligi jazylǵan. Epidemiia bastalǵaly beri elde 1 499 adam qaitys bolǵan. Shamamen alty millionnan astam halqy bar Ortalyq Aziia memleketi shilde aiynyń ortasynan bastap belgileri koronavirýsqa uqsaityn pnevmoniiany Covid-pen biriktire bastaǵan.
Tájikstannyń resmi oryndarynyń bergen málimeti boiynsha, elde 8,1 myń adamnan koronavirýs anyqtalǵan, 65 adam qaitys bolǵan. Naýqastardyń basym bóligi jazylǵan. Degenmen jergilikti belsendiler men keibir azamattar resmi derekke kúmán keltiredi. Buǵan deiin belsendilerdiń "indet qurbandaryn" óz betimen eseptei bastaǵany týraly habar taraǵan.
Al Túrkimenstan koronavirýs baryn resmi túrde moiyndaǵan joq. Alaida BAQ shilde aiynda eldegi aýrýhanalardyń tolyp ketkenin, pnevmoniia belgisi bar naýqastar men virýspen bailanysty adam ólimi kóbeigenin jazǵan edi.
