AQSh memlekettik departamenti oppozitsiialyq saiasatker Aleksei Navalnyidyń ýlanýyna Resei federaldyq tergeý qyzmetiniń (FSB) qatysy bar dep sanaidy. 23 jeltoqsanda CNN telearnasy AQSh memlekettik departamenti ókiliniń pikirin jariialady. Departament ókili Reseidi túrli qiturqy teoriialardyń kómegimen arnaiy qyzmettiń áreketin jasyrýǵa tyrysty dep aiyptaǵan.
"Resei kóptegen bir-birine qaishy qiturqy teoriialardy alǵa tartty. Mundai amaldardy Resei úkimetine qoiylýy tiis negizgi suraqtardan jaltarýǵa tyrysý dep baǵalaýǵa bolady" dedi AQSh memlekettik departamenti ókili. Onyń sózine qaraǵanda, saiasatkerdiń ýlanýyn basqasha túsindirý múmkin emes.
Vedomstvo ókili Navalnyi aǵzasynan "Novichok" qaldyqtary tabyldy dep qorytyndy jasaǵan Himiialyq qarýǵa tyiym salý jónindegi uiymnyń tujyrymyna kúmáni joǵyn aitqan.
"AQSh FS qyzmetkerleri Navalnyidy ýlaý úshin júikeni sal etip tastaityn "Novichok" ýyn paidalandy dep sanaidy. Onyń ýlanýyn basqasha túsindirý múmkin emes" dedi vedomstvo ókili. Onyń sózinen The Hill basylymy úzindi keltiredi.
The Hill jazýynsha, AQSh memlekettik departamentiniń málimdemesi Vashington men Máskeý arasyndaǵy qarym-qatynasty ýshyqtyryp jiberýi múmkin. CNN habarlaýynsha, Amerika sheneýnikteri Navalnyidyń jaǵdaiyna bailanysty Reseige sanktsiia ázirlegen. Biraq qujatty ázirge prezident Donald Tramp maquldamaǵan.
Maqala avtory Tramptyń Navalnyidyń ýlanýyna bailanysty pikir aitpaǵanyn da keltirgen.
Bellingcat, The Insider, Der Spiegel jáne CNN 14 jeltoqsanda jariialaǵan zertteýinde Aleksei Navalnyidyń ýlanýyna FSB-nyń qatysy bar dep tujyrym jasaǵan.
Resei biligi oppozitsionerdiń ýlanýyna qatysy joǵyn aitady. Jaqynda Pýtin Navalnyidy "ýlaǵymyz kelse, aiaǵyna deiin jetkizer edik" dep málimdegen. Pýtinniń baspasóz hatshysy Dmitrii Peskov baspasóz máslihaty kezinde Navalnyidy arnaiy qyzmettiń "baqylaitynyn" moiyndaǵan.
Tamyz aiynda Tomskiden Máskeýge ushyp bara jatqan Navalnyidyń háli kúrt nasharlap, esinen tanyp qalǵan. Pilot ushaqty jol boiyndaǵy Omskige jedel qondyryp, áýejaiǵa shaqyrtylǵan jedel járdem qyzmeti Navalnyiǵa atropin dárisin berip, ony jergilikti aýrýhanaǵa jatqyzǵan. Eki kúnnen keiin es-tússiz jatqan Navalnyidy arnaiy meditsinalyq ushaqpen Berlinge alyp ketken. Berlinde alynǵan biologiialyq úlgiler Navalnyidyń "Novichok" ýymen ýlanǵanyn kórsetti. Bul nátijeni basqa táýelsiz zertteýler de rastaǵan.
