AQSh Memlekettik departamenti odaqtastaryna "Ýkrainada "áskeri operatsiia" júrgizip jatqan Reseige Qytaidyń kómektesýge daiyn otyrǵany" jóninde qujat jibergen. Bul týraly AQSh diplomattaryna siltep, The Financial Times habarlady, dep jazady Azattyq.
Reseidiń Qytaidan kómek suraǵany jaily The Financial Times 13 naýryzda jazǵan. Alaida onda "Qytai keleshekte Reseige áskeri kómek bere me, álde qazir de kómektesip jatyr ma?" degen másele naqtylanbaǵan.
AQSh Ulttyq qaýipsizdik keńesshisi Djeik Sallivan 14 naýryzda Qytai Syrtqy ister ministri Ian Tszechimen Rimde kezdesip, osy máseleni talqylaýdy josparlap otyr. Sallivan Reseige "qol ushyn berýge", sonyń ishinde Batystyń sanktsiiasyna qarsy kómektesýge talpynbai-aq qoiý jóninde eskertetinin atap ótti.
"Qytaidyń sanktsiiaǵa qosylmai, Resei áreketin únsiz maquldaǵanyn kórip otyrmyz. Qytai bizdiń Ýkrainaǵa járdemimizdi aiyptap, beibit jolmen sheshilgeni jón dep málimdedi, biraq is júzinde ózi ol úshin saýsaq qimyldatqan joq", – degen Sallivan Reseidi qoldaityn bolsa Qytaiǵa da sanktsiia salynýy múmkin ekenin eskertti.
AQSh-taǵy Qytai elshiligi Reseidiń kómek suraǵany týraly eshteńe bilmeitinin málimdedi. Kremldiń baspasóz hatshysy Dmitrii Peskov Financial Times jariialaǵan habardyń shyndyqqa sai kelmeitinin, "operatsiiany júrgizýge Reseidiń óz kúshi jetetinin" aitty.
Buǵan deiin Qytai kompartiiasynyń tóraǵasy Si Tszinpin men Resei prezidenti Vladimir Pýtin Pekinde birlesken málimdemege qol qoiyp, eki el arasyndaǵy áriptestiktiń shegi bolmaitynyn atap ótken.
Qytai baspasózi Reseidiń Ýkrainaǵa basqynshylyǵyn meilinshe aqtap jazyp, "AQSh Ýkrainanyń biologiialyq qarý jasaityn laboratoriia salýyna kómektesti" degen Reseidiń negizsiz aiyptaryn da jii taratyp jatyr.
