اقش مەملەكەتتٸك دەپارتامەنتٸ وداقتاستارىنا "ۋكراينادا "ەسكەري وپەراتسييا" جٷرگٸزٸپ جاتقان رەسەيگە قىتايدىڭ كٶمەكتەسۋگە دايىن وتىرعانى" جٶنٸندە قۇجات جٸبەرگەن. بۇل تۋرالى اقش ديپلوماتتارىنا سٸلتەپ, The Financial Times حابارلادى, دەپ جازادى ازاتتىق.
رەسەيدٸڭ قىتايدان كٶمەك سۇراعانى جايلى The Financial Times 13 ناۋرىزدا جازعان. الايدا وندا "قىتاي كەلەشەكتە رەسەيگە ەسكەري كٶمەك بەرە مە, ەلدە قازٸر دە كٶمەكتەسٸپ جاتىر ما?" دەگەن مەسەلە ناقتىلانباعان.
اقش ۇلتتىق قاۋٸپسٸزدٸك كەڭەسشٸسٸ دجەيك سالليۆان 14 ناۋرىزدا قىتاي سىرتقى ٸستەر مينيسترٸ يان تسزەچيمەن ريمدە كەزدەسٸپ, وسى مەسەلەنٸ تالقىلاۋدى جوسپارلاپ وتىر. سالليۆان رەسەيگە "قول ۇشىن بەرۋگە", سونىڭ ٸشٸندە باتىستىڭ سانكتسيياسىنا قارسى كٶمەكتەسۋگە تالپىنباي-اق قويۋ جٶنٸندە ەسكەرتەتٸنٸن اتاپ ٶتتٸ.
"قىتايدىڭ سانكتسيياعا قوسىلماي, رەسەي ەرەكەتٸن ٷنسٸز ماقۇلداعانىن كٶرٸپ وتىرمىز. قىتاي بٸزدٸڭ ۋكرايناعا جەردەمٸمٸزدٸ ايىپتاپ, بەيبٸت جولمەن شەشٸلگەنٸ جٶن دەپ مەلٸمدەدٸ, بٸراق ٸس جٷزٸندە ٶزٸ ول ٷشٸن ساۋساق قيمىلداتقان جوق", – دەگەن سالليۆان رەسەيدٸ قولدايتىن بولسا قىتايعا دا سانكتسييا سالىنۋى مٷمكٸن ەكەنٸن ەسكەرتتٸ.
اقش-تاعى قىتاي ەلشٸلٸگٸ رەسەيدٸڭ كٶمەك سۇراعانى تۋرالى ەشتەڭە بٸلمەيتٸنٸن مەلٸمدەدٸ. كرەملدٸڭ باسپاسٶز حاتشىسى دميتريي پەسكوۆ Financial Times جارييالاعان حاباردىڭ شىندىققا ساي كەلمەيتٸنٸن, "وپەراتسييانى جٷرگٸزۋگە رەسەيدٸڭ ٶز كٷشٸ جەتەتٸنٸن" ايتتى.
بۇعان دەيٸن قىتاي كومپارتيياسىنىڭ تٶراعاسى سي تسزينپين مەن رەسەي پرەزيدەنتٸ ۆلاديمير پۋتين پەكيندە بٸرلەسكەن مەلٸمدەمەگە قول قويىپ, ەكٸ ەل اراسىنداعى ەرٸپتەستٸكتٸڭ شەگٸ بولمايتىنىن اتاپ ٶتكەن.
قىتاي باسپاسٶزٸ رەسەيدٸڭ ۋكرايناعا باسقىنشىلىعىن مەيلٸنشە اقتاپ جازىپ, "اقش ۋكراينانىڭ بيولوگييالىق قارۋ جاسايتىن لابوراتورييا سالۋىنا كٶمەكتەستٸ" دەگەن رەسەيدٸڭ نەگٸزسٸز ايىپتارىن دا جيٸ تاراتىپ جاتىر.
