5 tamyz kúni AQSh memlekettik hatshysy Maik Pompeo AQSh-tyń qytailyq mobildi qosymshalar men telekommýnikatsiialyq qyzmetterdi tyiýǵa talpynys jasaitynyn málimdedi. Ol Qytaidyń "memleket qoldaýyna ie" tehnologiialary AQSh ulttyq qaýipsizdigi men azamattarynyń jeke derekterine qater tóndiredi dedi.
Memlekettik hatshynyń bul málimdemesi eki el arasyndaǵy qarym-qatynas qiyndap bara jatqan tusta aityldy.
Pompeo AQSh-tyń Tiktok jáne WeChat sekildi "senimsiz" qytailyq tehnologiialardy amerikalyq mobildi qosymsha dúkenderinen alyp tastaiynyn, al amerikalyq mobildi qosymshalardyń qytailyq telefondarǵa aldyn ala ornatylýyn tyiatynyn aitty.
Bas diplomat sondai-aq Qytaidyń bultty qyzmet (saittarǵa men qoldanýshylarǵa Internet arqyly server qyzmetin usyný – red.) provaiderlerine AQSh territoriiasynda málimet jinaýǵa, saqtaýǵa jáne paidalanýǵa tyiym salynatynyn málimdedi. Onyń sózinshe, AQSh Qytaidyń telekommýnikatsiia qyzmetin kórsetetin tórt provaideriniń litsenziiasyn "joimaq" jáne "Qytai úkimetiniń qoldaýyna ie" sýasty kabeli júiesiniń provaiderlerine elderdi Internetke qosýyna kedergi jasamaq.
Osydan birneshe kún buryn AQSh prezidenti Donald Tramp ulttyq qaýipsizdikke siltep qytailyq TikTok mobildi qosymshasyna shúilikti. 31 shilde kúni Tramp tanymaldyǵy kún saiyn artyp bara jatqan TikTok qosymshasyna tyiym salýǵa shaqyrdy. Kóp uzamai ol amerikalyq Microsoft kompaniiasyna qosymshany 15 qyrkúiekke deiin satyp alýǵa múmkindik beretinin aitty.
-
TikTok Pekindegi ByteDance kompaniiasyna tiesili. Túrli effektilermen árlengen 15-60 sekýndtyq shaǵyn videony bólisýge arnalǵan TikTok áleýmettik jelisi alǵash 2016 jyly Douyin degen ataýmen Qytaida taralǵan. Keiinnen syrtqy naryqqa shyqty. 2018 jyly Muscial.ly kompaniiasymen qosylǵan soń álemde jyldam tarala bastady. Qazir onyń 1,5 milliardqa jýyq qoldanýshysy bar. Internet qoldanýshysy jelige tirkelerde jeke basynyń málimetin engizýi kerek.
-
4 tamyz kúni Qytai AQSh-ty TikTok jelisine "qysym jasap otyr" dep aiyptady.
- 2019 jyly qarashada TikTok jelisi Qytaidaǵy musylmandardy qýǵyndaý jaily videony joiǵanyna keshirim surady. Rolikte 17 jastaǵy bloger Feroza Áziz kirpik uzartý jaiynda aita kele, Qytaidaǵy musylmandardyń jaǵdaiyna oiysady, ony Holokostpen teńestirgen. Videorolik joiylmai turǵanda eki millionnan astam ret kórilgen.
