AQSh Kongresinde Qazaqstandy táýelsizdiktiń 30 jyldyǵymen quttyqtady. Bul týraly QazAqparat SIM silteme jasap habarlaidy.
AQSh Kongresindegi Ókilder palatasynyń músheleri Jaklin Valorski, Robert Aderholt jáne Stiven Shabot Qazaqstan táýelsizdiginiń jáne ekijaqty qarym-qatynastardyń 30 jyldyǵyna orai Kongrestiń resmi biýlleteninde tirkelgen jariialy málimdemeler jasady.
J. Valorski Qazaqstan Respýblikasynyń Tuńǵysh Prezidenti – Elbasy N. Nazarbaev saiasatynyń arqasynda qol jetkizgen Qazaqstannyń tamasha jetistikterin, Semei poligonyn jabý jáne iadrolyq arsenaldan bas tartý arqyly «iadrosyz bolashaq úshin mindettemelerdi qabyldaý» týraly sheshimderdiń kóregendigin, «Qazaqstanda erkin naryqtyq ekonomika qurý ideiasyna berilgendigin» jáne sheteldik investorlarmen jumystyń joǵary mańyzdylyǵyn tereń túsingenin joǵary baǵalady. Qazaqstanda odan ári jańǵyrtý boiynsha qadamdardyń qajettiligin aita kelip, ol «Prezident Qasym-Jomart Toqaev Qazaqstandaǵy qoǵamdyq ómirdiń barlyq salalaryna baǵyttalǵan ishki reformalardy, onyń ishinde azamattyq qoǵamnyń ashyqtyǵyn arttyrýǵa baǵyttalǵan qoldanystaǵy zańdardy jańartýǵa baǵyttalǵan saiasi jáne parlamenttik reformalardy júzege asyrýǵa úlken kóńil bólýde» dep málimdedi. «Qazaqstan 30 jyldan beri Ortalyq Aziiadaǵy beibit jáne turaqtandyrýshy kúsh bolyp qala berýde», bul eldiń demokratiia qundylyqtaryna beriktiginiń dáleli dep sanaidy Indiana shtatynda sailanǵan kongressvýmen.
Kongressmen R. Aderholt Qazaqstan halqyn táýelsizdiktiń 30 jyldyǵymen quttyqtap, álemniń strategiialyq mańyzdy óńirindegi elimizdiń airyqsha róline toqtaldy. «Prezident Qasym-Jomart Tokaevty jáne Qazaqstan halqyn qysqa merzim ishinde qol jetkizgen eleýli órleýimen quttyqtaimyn», – dedi ol. AQSh Kongresindegi Alabama shtatynyń ókili Qazaqstannyń AQSh-pen qorǵanys, qaýipsizdik, terrorizmge qarsy is-qimyl jáne basqa da ózara múddeli salalardaǵy ózara is-qimylyn joǵary baǵalady. Osy oraida eki el arasyndaǵy keńeitilgen strategiialyq seriktestikti jáne áriptesterimen qatar Qazaqstannyń iadrolyq qarýdy taratpaý salasyndaǵy jetekshi rólin, 2006 jyly Ortalyq Aziiadaǵy iadrolyq qarýdan azat aimaq týraly sharttyń mańyzdylyǵyn atap ótti.
AQSh Kongresindegi Qazaqstannyń dostary tobynyń teń tóraǵasy, Ogaio shtatynda sailanǵan kongressmen S. Shabot eki el arasyndaǵy ekonomikalyq bailanysty odan ári damytýdyń mańyzdylyǵyn aitty. Onyń aitýynsha, «Qazaqstanda myqty naryqtyq ekonomikany qalyptastyrýǵa kúsh salyp, sheteldik investitsiialarǵa tartymdy jaǵdai jasaý maqsatynda zań ústemdigi máselelerine kóp kóńil bólinedi». Osy oraida ol «Astana» Halyqaralyq qarjy ortalyǵynyń róline bólek toqtaldy.
AQSh Kongresiniń ókilderi qabyldaǵan jariialy málimdemeleri ekijaqty keńeitilgen strategiialyq seriktestiktiń qarqyndy damýynyń taǵy bir dáleli bolyp tabylady.
