AQSh Ierýsalimdi Izrail astanasy dep tanidy jáne óz elshiligin Tel-Avivten osy qalaǵa kóshiredi. Bul jaiynda AQSh prezidenti Donald Tramp Izrail, Palestina avtonomiiasy, Saýd Arabiiasy, Egipet jáne Iordaniia basshylarymen telefonmen sóilesken kezinde aitty, dep habarlaidy Azattyq.
Tramp Ierýsalimdi Izrail astanasy dep tanityny týraly málimdemesin búgin jasaidy dep josparlanǵan.
Elshilikti kóshirý tehnikalyq jáne uiymdastyrý jumystaryna bailanysty alty aidan erte bastalmaidy.
Arab elderiniń basshylary Donald Tramptyń sheshimin qatań synǵa aldy. Eýropa Odaǵynyń (EO) syrtqy saiasat jónindegi bas komissary Federika Mogerini palestinalyqtar men izraildikter arasyndaǵy bolashaq beibit kelissózge nuqsan keltiretin kez-kelgen qadamnan tartyný qajetin málimdedi. Frantsiia syrtqy ister ministrligi Ierýsalim mártebesi Izrail-Palestina kelissózi nátijesinde anyqtalýy tiis ekenin málimdedi.
AQSh biliginiń aty-jónin atamaǵan ókilderi Tramp óz sheshimi beibit kelissózdiń alǵa jyljýyna yqpal etedi dep biletinin habarlady. Olar degenmen bul sheshim Tramptyń resmi málimdemesinen keiin ǵana shartty bolatynyn eskertti.
Ierýsalimdi Izrail astanasy dep tanyp, AQSh elshiligin Ierýsalimge kóshirý halyqaralyq kelisimge qaishy. Batys elderiniń kópshiligi Ierýsalimdi Izraildiń astanasy dep moiyndamaidy. Palestinalyqtar musylman, hristian jáne evreilerdiń kieli oryndary shoǵyrlanǵan qalanyń eski bóligi - Shyǵys Ierýsalimdi ózderiniń astanasy dep tanýdy talap etip otyr.
1995 jyly AQSh Kongresi Izraildegi amerika elshiligin Ierýsalimge kóshirýdi mindetteitin jáne Ierýsalimdi tutastai Izraildiń astanasy dep tanýǵa shaqyratyn zań qabyldaǵan. Biraq AQSh-tyń burynǵy prezidentteri Bill Klinton, kishi Djordj Býsh jáne Barak Obama Kongrestiń eldiń syrtqy saiasatyn anyqtaityn quqyǵy joǵyn aityp, tabandap qarsy shyqqandyqtan ol zań oryndalmaǵan.
