AQSh Energetika ministrliginiń jańa esebine sáikes, 2020 jyldyń naýryzynda álemdegi munai óndirý kólemi táýligine 1,2 mln barrelge nemese 1,2 paiyzǵa tómendedi, dep habarlaidy "Ult aqparat" Telegram-daǵy Tengenomika arnasyna silteme jasap.
Bul rette munai tutyný kólemi táýligine 10,1 mln barrelge nemese 10 paiyzǵa qysqaryp, sonyń nátijesinde Ekonomikalyq yntymaqtastyq jáne damý uiymy elderindegi munaidyń kommertsiialyq qory 7 paiyzǵa artty jáne 2017 jyldyń maýsymynan beri alǵash ret 3 mlrd barrel sheginen asyp tústi.
Al AQSh Energetika ministrliginiń baǵalaýyna sáikes, álemdegi munai tutyný kóleminiń quldyraý shegi sáýir aiynda táýligine 16,7 mln barrelge jetip, ondan keiin birtindep qalpyna keledi. 2020 jyldyń qorytyndysynda suranystyń quldyraýy táýligine 5,25 mln barrel bolady. Buǵan qosa, jyl boiy óndiris kólemi táýligine 1,2-1,4 mln barrel sheginde qysqara túsedi. Osyǵan bailanysty 2020 jyldyń kóktem jáne kúz ailarynda álemdegi munaidyń kommertsiialyq qory tarihi maksimýmyna shamamen 3,4 mlrd barrelge jetedi.
Osyndai ahýaldyń aiasynda AQSh Energetika ministrligi osy jyldyń sáýir-maýsym ailarynda Brent markaly munaidyń ortasha ailyq quny 23 dollarǵa deiin quldyraityndyǵyn kútedi. Degenmen, sodan keiin munai baǵasy 2020 jyldyń jeltoqsanyna deiin birtindep qalpyna kelip, barreline 35 dollarǵa jetpek. Al 2021 jyly Brent baǵasy barreline 48 dollarǵa deiin ósýi múmkin.
AQSh Energetika ministrliginiń boljamdy baǵalaýynan shyǵatyn birqatar qorytyndy mynadai:
1. Taiaý eki jyldyń ishinde munai baǵasy barreline 50 dollardan asady deýge eshqandai negiz joq.
2. Bul boljamda OPEK+ pen G20 elderiniń munai óndirý kólemin táýligine 10 mln barrelge deiin qysqartý týraly kelisimge kelý múmkindigi eskerilmegen siiaqty. Álem elderi mundai kelisimge kelgen jaǵdaida ol sáýirdegi álemdegi munai profitsitin táýligine 16 mln barrelden 5-6 mln barrelge deiin tómendete alady. Nátijesinde kóktemde jáne jazda munaidyń ortasha ailyq baǵasy 23 dollardan joǵarylap, 34-40 dollarǵa jetip qalýy múmkin.
3. Eń nashar nusqanyń ózinde Brent baǵasy ortasha eseppen alǵanda barreline 23 dollardan tómen bolmaidy. Bul tipti munai eksporttaýshy elder shikizatty óndirý kólemin qysqartýǵa kelise almasa da USD/KZT baǵamynyń boljamy 448-450 teńge deńgeiinde shekteledi degendi bildiredi.
