Qazaqstan álemdik arenada kóshbasshyǵa ainaldy. Bul týraly búgin Aqordada QR Prezidenti Qasym-Jomart Toqaevqa senim gramotasyn tapsyrǵannan keiin BAQ ókilderine arnalǵan brifingte AQSh Elshisi Ýiliam Mozer aitty, dep habarlaidy QazAqparat tilshisi.
«Qazaqstan Prezidenti Qasym-Jomart Toqaevqa AQSh-tyń Qazaqstandaǵy Elshisi retindegi qyzmetimniń bastalǵandyǵyn rastaityn senim gramotasyn tapsyrý men úshin úlken qurmet boldy. Osydan 20 jyl buryn Almatydaǵy Elshilikte jumys istegen edim jáne osy elge qaita oralǵanyma qýanyshtymyn. Meniń birinshi jáne sońǵy kelgen ýaqytymnyń aralyǵynda Qazaqstan qol jetkizgen úlken tabysty zor rizashylyqpen atap ótkim keledi», - dedi ol.
Sonymen qatar, AQSh Elshisi Qazaqstannyń jańa elordasynyń zamanaýi kelbetine, sáni men sáýleti kelisken ǵimarattarǵa tánti bolǵandyǵyn da atap ótti.
«Qazaqstan aitarlyqtai progreske qol jetizgen. Halqynyń ómir súrý deńgeii aitarlyqtai jaqsaryp, ál-aýqaty arta túsken. Buǵan qosa, Qazaqstanmen keńeitilgen strategiialyq áriptestigimizdiń mańyzdylyǵyna joǵary baǵa beremiz. Qazaqstannyń Tuńǵysh Prezidenti Nursultan Nazarbaevtyń strategiiasy men batyldyǵyn joǵary baǵalaimyz. Ol Qazaqstandy iadrolyq qarýdy taratpaý salasyndaǵy kóshbasshyǵa ainaldyrdy. Prezidenttiń bul mindettemesi bizdiń áriptestigimizdiń negizi bolyp qala beredi», - dedi Ýiliam Mozer.
Ol Qazaqstannyń amerikalyq kompaniialar tarapynyń kommertsiialyq investitsiialaryna ashyq ekendigin de atap ótti.
Bul eki elge de paida ákeletindigin basa aitty. «Ótken jyldardyń ishinde Qazaqstan Ortalyq Aziiada, sonymen qatar álemdik arenada da kóshbasshyǵa ainalǵanyn atap ótkim keledi. Qazirgi ýaqytta Qazaqstan kóptegen salalarda, BUU Qaýipsizdik keńesiniń halyqaralyq protsesterinde mańyzdy rólge ie. Sondai-aq, Qazaqstan barlyq janjaldardy beibit jolmen sheshýdiń jaqtaýshysy boldy jáne solai bolyp qala beredi. Qazaqstannyń Tuńǵysh Prezidenti Nursultan Nazarbaevqa birneshe ondaǵan jyl danalyqpen elge basshylyq jasaǵan úshin qurmetim men rizashylyǵymdy bildirgim keledi. Ol eń qiyn kezeńderdiń ózinde Qazaqstandy Táýelsizdikke, egemendikke, gúldenýge bastady. Qurmetti Prezident Q.Toqaevpen birleske jumysymyz jemisti bolaryna senim artamyn», - dedi AQSh Elshisi.
