Resei Ýkraina aýmaǵyna basyp kirgeli beri jeti myńnan astam soldatynan aiyryldy. Bul Irak pen Aýǵanstandaǵy 20 jyldyq soǵysta qaza bolǵan amerikalyq soldattardyń jiyntyq kórsetkishinen de kóp. AQSh barlaý qyzmetiniń málimetine súiengen The New York Times basylymy osylai dep jazdy.
Basylymnyń jazýynsha, 24 aqpannan beri 14-21 myń aralyǵynda Resei soldaty jaralanǵan. Resei Ýkrainadaǵy soǵysqa barlyǵy 150 myń áskerin tartqan.
Derekkóziniń habarlaýynsha, Resei armiiasynyń shyǵyny týraly málimet jýyqtap alynǵan jáne ol ashyq derekkózderge súienip eseptelgen. Ýkraina qorǵanys ministrligi men spýtnik málimetteri de paidalanylǵan.
AQSh qorǵanys ministrligi ókilderiniń aitýynsha, adam shyǵynynyń kóptigi Resei áskeri qyzmetkerleriniń moraldyq kóńil-kúiine áser etýi múmkin, keibiri ózderiniń soǵysyp júrgenderin de bilmeidi.
Ýkraina biliginiń aitýynsha, Resei 14 myńǵa jýyq soldatynan aiyrylǵan. Al Resei qorǵanys ministrligi Ýkraina jaqtan 18 myńnan astam adam qaza boldy deidi.
Osyǵan deiin Resei biligi adam shyǵyny jóninde bir ret qana esep bergen. 2 naýryzda vedomstvo 498 reseilik soldattyń opat bolǵanyn habarlaǵan. Al Ýkraina prezidenti Vladimir Zelenskii osy aptada 1300 ýkrain soldatynyń qaza tapqanyn málimdegen.
Soǵys kezinde adam shyǵyny týraly málimetterdiń rastyǵyn tekserý óte qiyn.
24 aqpanda Resei prezidenti Vladimir Pýtin Ýkrainany "denatsifikatsiia jáne demilitarizatsiialaý" maqsatynda kórshi elge basyp kirgen. Pýtin NATO Ýkrainany Reseige qarsy shepke ainaldyrǵysy keledi dep málimdegen. Ýkraina men NATO muny joqqa shyǵarady.
