Qytai, Resei jáne Iran AQSh-taǵy prezident sailaýyna jaqyn qalǵanda amerikalyq daýys berýshilerdiń tańdaýyna áser etýge tyrysyp otyr. Resei sailaýǵa Demokratiialyq partiianyń atynan túsip otyrǵan Djo Baidenniń bedelin buzýǵa árekettense, Qytai men Iran Donald Tramptyń qaita sailanýyna kedergi jasap jatyr. Mundai málimdemeni 7 tamyz kúni AQSh Ulttyq qarymta barlaý jáne qaýipsizdik ortalyǵynyń direktory Ýiliam Iveinina (myrza) jasady.
"Biz Qytai prezident Tramptyń qaita sailanǵanyn qalamaidy degen qorytyndyǵa keldik. Resmi Pekin Trampty áreketin boljap bilýge bolmaityn adam dep sanaidy... Biz Resei burynǵy vitse-prezident Baidenniń bedeline nuqsan keltirý úshin túrli amalǵa baryp otyr degen qorytyndyǵa keldik. Resei ony antireseishil isteblishment sanaidy" delingen Iveinina málimdemesinde.
Iveininanyń sózinshe, shetel úkimetteri amerikalyq sailaýshylardyń tańdaýyna ashyq jáne jasyr kúide yqpal etýin, kelispeýshilikti qozdyrýyn jáne amerikalyqtardyń demokratiialyq protseske senimin búldirýin jalǵastyra bermek.
AQSh prezidenti Donald Tramp jýrnalisterdiń barlaý qyzmetiniń qorytyndysyna senetinin-senbeitinin suraǵanda: "Ras bolýy múmkin... Biraq Reseidiń Aq úiden Donald Trampty kórgisi keletini ekitalai" dep jaýap berdi.
AQSh prezidentiniń sailaýy biyl qarashada ótedi.
