Prezident Vladimir Pýtin Ýkrainada Resei áskeriniń qalai soǵysyp jatqanyn jáne "áskeri operatsiianyń" qanshalyqty "sátti júrgizilip" jatqandyǵynan ishinara habarsyz, sebebi keńesshileri shyndyqty odan jasyrady. AQSh barlaý qyzmetiniń deregine súiengen Amerika ákimshiliginiń ókili Associated Press agenttigine osylai dep málimdedi. Bul týraly Azattyq radiosy habarlaidy.
AQSh prezident ákimshiligi ókiliniń sózine qaraǵanda, Pýtin áskeri boryshyn ótep júrgenderdiń soǵysqa alynǵandyǵyn jáne olardyń qaza bolǵanyn bilmeidi. Resei prezidenti osyǵan deiin "arnaiy operatsiiaǵa" tek jaldamaly ásker ǵana qatysyp jatyr dep málimdegen. Alaida qorǵanys ministrligi keiin Ýkrainada áskeri boryshyn ótep júrgender de bar ekenin jáne olardyń tutqynǵa túskenin moiyndaǵan. Qorǵanys ministrligi olardyń barlyǵy Reseiden áketildi dep sendirýge tyrysqan.
Amerika sheneýniginiń aitýynsha, sonymen birge keńesshiler Pýtinge Batys sanktsiiasynyń Resei ekonomikasyna yqpaly jaily aqparatty tolyq jetkizbeidi. Sebebi Pýtinniń ainalasyndaǵylar prezidentke "shyndyqty aitýdan qorqady".
Derekkózdiń aitýynsha, Pýtin áskerilerdiń maidandaǵy shynaiy jaǵdaidy jasyryp otyrǵanyn sezedi jáne osy fakt prezident pen qarýly kúshter arasyndaǵy jaǵdaiǵa salqynyn tigizgen.
Kreml ázirge aqparatqa túsinikteme bergen joq.
Resei Ýkrainaǵa soǵys ashqaly beri Pýtin jurt aldyna sirek shyǵatyn bolǵan. Ýkrainadaǵy soǵysqa bailanysty birneshe ret qana túsinikteme bergen. Resei resmi túrde Ýkrainany "denatsifikatsiia" jáne "demilitarizatsiialaýdan" bas tartqan joq. Dese de, kelissózge Resei jaǵynan qatysyp jatqan Vladimir Medinskiidiń aitýynsha, Ýkrainanyń NATO-dan bas tartýy jáne beitarap mártebesin jariialaýy Resei talaptarynyń oryndalǵany bolyp esepteledi.
Soǵystyń bastalǵanyna bir aidan asty. Birqatar "jetistikterge" qaramastan Resei áskeri Ýkraina armiiasyn tyqsyra alǵan joq jáne Hersonnan basqa birde-bir oblys ortalyǵyna baqylaý ornatqan joq.
