Vashington Aýǵanstannyń "birtutastyǵy men egemendigin" qoldaidy jáne qos úkimet qurýǵa baǵyttalǵan kez kelgen áreketke qarsylyq bildiredi dep málimdedi AQSh memlekettik hatshysy Maik Pompeo. 9 naýryzda Kabýlda Aýǵanstan prezidenti qyzmetine kirisý rásimin sońǵy sailaýǵa qatysqan eki negizgi kandidat qatar ótkizgen. Qazirgi is basyndaǵy memleket basshysy Ashraf Ǵani prezident saraiynda ant qabyldap jatqanda, kórshi saraida onyń básekelesi, ózin "prezident sailaýynda jeńdim" dep jariialaǵan eldiń burynǵy úkimet jetekshisi Abdýlla Abdýllanyń saltanatty ulyqtaý rásimi ótken edi.
"Biz qos úkimet qurýǵa baǵyttalǵan jáne saiasi máselelerdi kúshpen sheshýdi kózdeitin kez kelgen áreketke úzildi-kesildi qarsymyz" dep málimdedi Pompeo.
Buǵan qosa ol 9 naýryzda Kabýlda jasalǵan terrorlyq shabýyldy aiyptady. Khaama Press aqparat agenttigi jeksenbi kúni Ashraf Ǵanidyń inaýgýratsiiasy ótip jatqan kezde prezident saraiy mańyna tórt snariad túskenin habarlaǵan. Shabýylǵa jaýapkershilikti "Islam memleketi" ekstremistik toby alǵan.
Kórshi ornalasqan eki saraidaǵy saltanatty sharalarǵa júzdegen adam qatysqan.
Ashraf Ǵanidyń inaýgýratsiiasyna qatysýshylar arasynda AQSh-tyń Aýǵanstan boiynsha arnaiy ókili Zalmai Halilzad pen Aýǵanstandaǵy halyqaralyq koalitsiia kúshteriniń basshysy, AQSh generaly Skott Miller de boldy.
