AQSh ádilet ministrligi 30 shilde kúni eldiń qarjy ministrligine burynǵy prezident Donald Tramptyń salyq deklaratsiiasyn Kongrestiń biýdjet komitetine ótkizýdi tapsyrdy. Osy komitet kóp jyl boiy osy qujattardy alýǵa talpynǵanmen ony qolǵa túsire almaǵan edi.
Ádilet ministrligi memorandýmynda AQSh Demokratiialyq partiiasy ókilderi basym Kongrestiń ókilder palatasynyń biýdjet komiteti Respýblikashylar partiiasyna múshe, kezinde kásipkerden el prezidentine ainalǵan saiasatkerden (Tramptan) salyq tóleý deklaratsiiasyn kórsetýin talap etý úshin "jetkilikti dáiekter" usynǵanyn atap ótken. Donald Tramp AQSh prezidenti bolyp turǵanda onyń iskerlik is-áreketin teksergisi kelgen Kongrestegi demokrattardyń talpynysyna únemi tosqaýyl qoiyp otyrdy.
Sol kezdegi AQSh qarjy ministri Stiven Mnýchin (Tramptyń) salyq deklaratsiiasyn Kongrestiń biýdjet komitetine bermeitinin, óitkeni Ókilder palatasyndaǵy sany basym demokrattar muny óz jeke-dara partiialyq múddesine paidalaný maqsatymen suratyp otyr degen qorytyndyǵa kelgenin málimdegen edi. Komitet Tramp pen onyń kompaniialary óz is-áreketinde eldiń salyq zańdaryn qanshalyqty saqtaǵanyn teksergisi keletinin atap aityp otyr. Kongrestiń tómengi palatasynyń spikeri Nensi Pelosi 30 shilde kúni Tramptyń salyq deklaratsiiasyn qolǵa túsirý "ulttyq qaýipsizdik úshin mańyzdy másele" dep málimdedi. Burynǵy prezident Tramp tarabynan onyń ádilet ministrliginiń (atalǵan sharasy úshin) ústinen sotqa shaǵym túsirgisi keletini jaily ázirge eshqandai túsinikteme berilmedi.
AQSh-tyń basqa prezidentterinen aiyrmashylyǵy sol, Donald Tramp óz salyq deklaratsiiasy týraly qujattardy jáne jeke bailyǵy men otbasylyq kompaniiasy sanalatyn "Trump Organization" jónindegi ózge qujattardy jariialaýdan bas tartqan. Ol kezinde AQSh Federaldyq salyq ministrliginiń aýditine bailanysty óz salyq deklaratsiiasy mazmunyn jariialai almaitynyn málimdegen edi, biraq ol aýdit nege sonshama uzaq ýaqytqa sozylǵany áli kúnge deiin túsiniksiz másele bolyp sanalady.
