Aqsai qalasynda Abaidyń eskertkishi ornatylatyn bolady, – dep habarlaidy QazAqparat.
BQO mádeniet basqarmasy basshysynyń mindetin atqarýshy Sairan Dúisenteginiń aitýynsha, eskertkishtiń eskizdik jobalary oblystyq komissiiadan ótip, QR Mádeniet jáne sport ministrligine jiberildi. «Respýblikalyq komissiia qaraǵannan keiin jumys ári qarai jalǵasatyn bolady», dedi QazAqparat tilshisine S.Dúisentegi.
Oblystyq tilderdi damytý basqarmasy buqaralyq aqparat quraldary jáne memlekettik emes uiymdarmen jumys bóliminiń basshysy Sveta Ǵanievanyń sózine qaraǵanda, óńirde Abaidyń 175 jyldyǵyna orai merekelik is-sharalar jospary jasaldy.
Arnaiy qurylǵan jumys toby túrli formattaǵy 861 is-sharany bekitti. Sonyń ishinde tórteýi – halyqaralyq, altaýy – respýblikalyq, qalǵandary – oblystyq, qalalyq, aýdan, aýyldyq deńgeide ótetin sharalar. Abaidyń 175 jyldyǵyna arnalǵan sharalar qańtar aiynda-aq bastalyp ketti.
Degenmen resmi túrde 18 aqpan kúni H.Bókeeva atyndaǵy oblystyq qazaq drama teatrynda ótetin «Abai murasy – qazaqtyń rýhani qazynasy» atty saltanatty sharadan bastaý alady. Sondai-aq Oralda halyqaralyq deńgeide «Abai murasy – álemdik mádeniet qazynasy», «Abai Qunanbaev: HHI ǵasyrdaǵy bilim jáne ǵylym» atty konferentsiia, «Abai-Pýshkin» atty jastar forýmyn uiymdastyrý josparlansa, Shyńǵyrlaý aýdanynda «Abai álemi: qazaq ádebieti men tiliniń búgini, bolashaǵy» taqyrybynda respýblikalyq ǵylymi-tájiribelik konferentsiia ótedi. Qaztalov aýdanynda «Abai jáne Pýshkin» halyqaralyq konferentsiiasyn ótkizý oilastyrylýda.
Oǵan qosa oblys ortalyǵyndaǵy Abai alańy qaita jańǵyrtylmaq. A.S.Pýshkin mýzeiinde Abai ekspozitsiiasy jasaqtalyp, shaharda jazýshylar alleiasyn ashý josparlandy. H.Bókeeva atyndaǵy qazaq drama teatry M.Áýezovtiń «Abai» spektaklin jurtshylyq nazaryna usynbaqshy. Abaidyń aýdarmalary boiynsha qýyrshaq teatry balabaqsha búldirshinderine arnap qoiylymdar qoiady. Ǵ.Qurmanǵaliev atyndaǵy oblystyq filarmoniiasynyń Dáýletkerei atyndaǵy qazaq halyq aspaptar orkestri men QR eńbek sińirgen qairatkeri Qatimolla Berdiǵalievtiń «Abai ánderi» atty kontserti de uiymdastyrylady.
Aita keteiik, buǵan deiin Abaiǵa arnalǵan eskertkish Oral qalasy men Tasqala aýdany ortalyǵynda boi kótergen bolatyn.
