QR Aqparat jáne qoǵamdyq damý ministrliginde biyl alǵash ret Aqparat jáne qoǵamdyq damý salasyndaǵy qoǵamdyq keńestiń otyrysy ótti, dep habarlaidy "Ult aqparat".
Epidemiologiialyq jaǵdaidy eskere otyryp, otyrys onlain formatta júrgizildi. Is-sharaǵa Qoǵamdyq keńes músheleri, úkimettik emes uiymdardyń ókilderi, memlekettik organnyń vedomstvolyq baǵynysty uiymdary jáne taǵy basqalary qatysty.
Ministrlikten málim etkendei, otyrys barysynda pandemiia kezindegi aqparattyq jumys jáne BAQ-qa qoldaý kórsetý, etnosaralyq qatynastar salasyndaǵy memlekettik saiasat, sonymen qatar ÚEU granttyq jobalaryn josparlaý jáne iske asyrý ádistemesin jetildirý týraly máseleler talqylandy.
«Memleket basshysy Qazaqstan halqyna Joldaýynda memleket pen qoǵamnyń ózara is-qimyl nysandaryn odan ári damytý, qoǵamdyq monitoring jáne memleket qabyldaityn sheshimderdi baqylaý qajettigin atap ótti. Sondyqtan «Qoǵamdyq baqylaý týraly» Zań osy máselege baǵyttalatyn bolady», - dedi Aqparat jáne qoǵamdyq damý ministri Aida Balaeva.
A.Balaevanyń aitýynsha, bilim men eńbekke umtylý arqyly ulttyń adami kapitalynyń sapasyn arttyrý mindetin jurtshylyqpen yntymaqtastyq arqyly ǵana júzege asyrýǵa bolady. Ministrlik mundai kezdesýlerdi turaqty negizde ótkizýdi josparlap otyr.
«Biz sizderdiń usynystaryńyz úshin árqashan ashyqpyz jáne olardy belsendi talqylaýǵa daiynbyz», - dedi ministr.
Onlain otyrys barysynda Qoǵamdyq keńes músheleriniń pikirleri talqylanyp, aqparat, azamattyq qoǵammen ózara is-qimyl jáne etnosaralyq qatynastar salalaryndaǵy jumysty jetildirý boiynsha usynystar tyńdaldy.
Aitylǵan barlyq pikirlerdi, eskertýler men usynystardy hattamaǵa engizý jáne jaýapty tulǵalardyń nazaryna jetkizý jóninde tapsyrmalar berildi.
