Aqparat jáne qoǵamdyq damý ministri Aida Balaeva memlekettik organdardyń otyrystarynyń onlain rejimde ótkizilýine qatysty pikir bildirdi, dep habarlaidy "Ult aqparat".
«Bizdiń ministrlikke qatysty aitar bolsam, dóńgelek ústel men otyrystyń bári de áleýmettik jeliler arqyly tikelei efirden kórsetiledi. Meniń oiymsha basqa da memlekettik organdar óz jumysyn onlain-rejimde ótkizýge tyrysyp júr. Sol sekildi Ulttyq qoǵamdyq senim keńesiniń otyrysy da onlain transliatsiia arqyly berildi. Osy úlgi boiynsha basqa da memlekettik organdar jumys júrgizer degen oidamyn», - dedi Aida Balaeva OKQ-da ótken baspasóz máslihatynda.
Ministrge baspasóz máslihaty barysynda tilshiler máslihattardyń otyrystaryna qatysty suraq qoidy. Tilshilerdiń biriniń aitýynsha Almaty qalasynyń máslihaty onlain-transliatsiia júrgizbeidi, sessiialarǵa jýrnalisterdi kirgizbeidi.
«Men bul máselemen tanyspyn. Osyǵan bailanysty men de Almaty qalasynyń ákimdiginiń apparatyna júgingim keledi. Álbette buǵan jol berilmeýi tiis. Sebebi dál qazirgi ýaqyt ashyqtyq pen konstrýktivti dialogty talap etedi», - dedi ol.
